Emri i Meghan Markle vazhdon të qarkullojë në media, vëllai i saj arrestohet për vozitje në gjendje të dehur

Thomas Wayne Markle Jr., gjysmëvëllai i Meghan Markle, është arrestuar në Oregon për vozitje në gjendje të dehur.

Policia ka njoftuar se ai kishte pasur sasi të ndaluar alkooli në organizmin e tij kur është arrestuar në orët e vona në qarkun Josephine në verilindje të shtetit amerikan, Oregon.

Autoritetet kanë thënë përmbajtja e alkoolit në gjakun e tij ka qenë 0.11 për qind, mbi limitin e lejuar (që është 0.08 për qind).

52-vjeçari nga Grants Pass është dërguar në një qendër detoksikimi dhe tash mbi të rëndon akuza për vozitje në gjendje të dehur.

Lexo po ashtu Lajmet për Meghan Markle

Meghan Markle, një ish-aktore amerikane, në maj të viti të kaluar u martua me princin Harry dhe është bërë dukesha e Sussexit.

Çifti është në pritje të fëmijës së parë, mirëpo emri i 37-vjeçares ka qarkulluar vazhdimisht në media, në veçanti për problemet e shumta të familjarëve të saj.

Ajo nuk ka raporte të mira me babanë e saj, Thomas Markle Sr., si edhe me fëmijët nga martesa e tij e parë.

Thomas Markle Sr. u martua me Roslyn Loveless në vitin 1964, me të cilën i ka dy fëmijë, Samantha (e lindur në vitin 1964) dhe Thomas Markle Jr. (i lindur në vitin 1966). Ata u ndanë në vitin 1975.

Në vitin 1979, ai u martua me Doria Ragland, me të cilën në vitin 1981 u bënë prindër të vajzës Rachel Meghan Markle (e njohur vetëm si Meghan Markle). Thomas dhe Doria u shkurorëzuan në vitin 1988. /Telegrafi/