McManaman këshillon Liverpoolin: Rikthejeni Coutinhon në skuadër, është lojtar i shkëlqyeshëm

Steve McManaman ka thënë se Liverpooli duhet të marrë në konsideratë rikthimin e brazilianit Philippe Coutinho në Anfield nëse ai mund të transferohet nga Barcelona për një tarifë të arsyeshme.

Reds u ndanë me yllin brazilian në afatin kalimtar të dimrit të vitit 2018 për një shifër të raportuar prej 140 milionë eurosh dhe fondet e krijuara nga shitja e tij lejuan Jurgen Klopp të investojë shumë në skuadër, ku transferimi i madh ishte ai i mbrojtësit Virgil van Dijk.

Ardhjet e reja në Anfield kanë lulëzuar, në atë që tani është një skuadër rekord, por ky fat nuk e ndoqi edhe Coutinhon, i cili ‘humbi’ në Camp Nou.

Ai aktualisht e gjen veten në huazim te Bayern Munichu dhe përballet me një të ardhme të pasigurt.

McManaman ka thënë se 27-vjeçari do të ishte i mirëpritur përsëri në Anfield, me Reds që ende nuk e kanë gjetur një pasardhës të përshtatshëm në rolin e tij.

“Drejtuesit mund të vendosin të sjellin përsëri Coutinhon në klub. Nuk ka dyshim se do doja ta shihja atë përsëri. Është një lojtar i shkëlqyeshëm, por varet shumë edhe nga ana ekonomike”, ka thënë fillimisht McManaman për HorseRacing.net.

“Nëse ata mund ta rikthejnë Coutinhon me një tarifë të arsyeshme dhe të shesin dy lojtarë që nuk luajnë rregullisht, atëherë kjo mund të funksionojë”.

“Ka zëra që Xherdan Shaqiri mund të largohet në fund të sezonit, dhe Adam Lallana mund të dëshirojë të luajë më shpesh”.

“Nëse ka hapësirë ​​në dispozicion, sigurisht që do të më pëlqente rikthimi i Coutinhos, pasi ai ishte një lojtar i mrekullueshëm për Liverpoolin. Ai është ai lloji i lojtarit që kur plani A nuk funksionon, ai mund të ndryshojë lojën”.

“Ai shënoi disa gola të jashtëzakonshëm për Liverpoolin dhe megjithëse do të duhej t’i fitonte përsëri tifozët pasi kërkoi të largohej, unë mendoj se shumica e tifozëve do ta pranonin se sa i mirë ishte ai për Liverpoolin”.

“Pra, nëse ai dëshiron të kthehet te Liverpooli dhe marrëveshja është e mirë, atëherë nuk do të kisha asnjë kalkulim ta merrja përsëri sepse është një lojtar i mirë”, përfundoi legjenda angleze.

Ndryshe, Coutinho bëri 201 paraqitje për Reds gjatë pesë viteve, duke shënuar 54 gola dhe një numër mbresëlënës asistimesh. /Telegrafi/