Kompletohen ekipet çerekfinaliste të Kupës së Kosovës, shorti hidhet të martën  

Sot (e diel) gjatë ditës janë zhvilluar katër ndeshjet e mbetura të 1/8-tës së finales në Digitalb Kupën e Kosovës në futboll.

Klubet si Feronikeli, Trepça’89,  Ballkani dhe Kika kanë kaluar tutje në çerekfinale, pas fitoreve në ndeshjet e 1/8-tës, duke iu bashkuar kështu Prishtinës, Ferizajt, Vëllaznimit dhe Dritës që siguruar dje kalimin tutje.

Feronikeli ka shënuar fitore si mysafirë kundër Dukagjinit të Klinës, me rezultat të thellë 4:0, ku të gjitha golat erdhën në pjesën e dytë.

Fitore bindëse ka realizuar edhe Ballkani që e ka mposhtur Gjilanin në shtëpi, me shifrat 3:0, ku golat erdhën në pjesën e parë.

Trepça’89 arriti ta thyejë rezistencën e Flamurtarit vetëm pas vazhdimeve, ngase ndeshja në kohën e rregullt u mbyll baras 0:0, edhe pse Flamurtari nga minuta e 60-të luajti me një lojtar më pak pas përjashtimit të Andi Shalës.

Në vazhdime klubi mitrovicas u tregua bindës, duke shënuar tre gola dhe duke siguruar kalimin tutje në çerekfinale.

Në ndeshjen e fundit, Kika ka kaluar tutje pas penalltive, duke e mposhtur Istogun me rezultat 3:1, pasi koha e rregullt dhe vazhdimet u mbyllën baras 2:2.

Tërheqja e shortit për çerekfinale të Digitalb Kupës së Kosovës do të bëhet të martën, më 11 dhjetor, në orën 13:00, në selinë e FFK-së.

Rezultatet komplete të 1/8 së finales në Kupën e Kosovës:

Liria – Prishtina 0:4

Fushë Kosova – Ferizaj 1:2

Drita – Minatori 5:3

Besa – Vëllaznimi 0:0 – 2:3 (penallti)

Ballkani – Gjilani 3:0

Dukagjini – Feronikeli 0:4

Trepça’89 – Flamurtari 0:0 – 3:0 (vazhdime)

Kika – Istogu 2:2 – 3:1 (penallti)

/Telegrafi/