Ndalohet kënga ‘Albanian’ në Mal të Zi, vjen reagimi i reperëve kosovarë (Video)

Vite më parë, rap-grupi i njohur Etno Engjujt, Lyrical Son dhe Dj Blunt kanë publikuar këngën “Albanian”.

Një këngë me motive patriotike, në klipin e së cilës promovoheshin fytyrat më të mëdha të kombit shqiptar, u bë hit i asaj kohe, dhe sot e kësaj dite kujtohet si një ndër këngët më të suksesshme të reperëve në fjalë.

Lexo po ashtu Të gjitha lajmet nga Estrada Shqiptare

Një këngë e tillë është dëgjuar në të gjitha trojet shqiptare, dhe vazhdon të dëgjohet, mirëpo shteti i malit të Zi, së fundmi nuk e ka miratuar transmetimin e një projekti të tillë në televizionet atje.

Agjencia për mediat elektronike e Malit të Zi u ka shqiptuar vërejtje televizioneve “Boin” dhe “Teuta” për shkak të transmetimit të dy klipeve muzikore shqiptare me rastin e festës 28 nëntorit – Ditës së Flamurit.

Njëra nga këngët përkatësisht ishte “Albanian” e reperëve në fjalë, gjë për të cilën këta të fundit sa e dëgjuan filluan me njëherë me reagime në rrjetet sociale.

Ka qenë pikërisht reperi shqiptar nga Mali i Zi, Genc Prelvukaj, i cili në InstaStory ka shkruar: “Pas shume paralajmërimeve si duket shteti i Malit të Zi e paska urdhëruar ndalimin e transmetimit te këngës Albanian”, ndërsa Lyrical Son po ashtu ka publikuar lajmin duke thënë se “ #Albanian, ju s’mund të ndaloni”.

Ndërkohë, kënga në fjalë aktualisht vazhdon të jetë e ndaluar për televizionet malazeze që të transmetohet. /Telegrafi/