Reagon Kremlini, pas miratimit të “paketës së madhe” për Ukrainën nga Dhoma e Përfaqësuesve e SHBA-së

Zëdhënësi zyrtar i Kremlinit ka reaguar ndaj votimit të sotëm në të cilin Dhoma e Përfaqësuesve e SHBA-së ka miratuar dërgimin e 60.8 miliardë dollarëve ndihmë të huaj për Ukrainën.

Sipas mediave të huaja, përcjell Telegrafi, Dmitry Peskov thotë se ndihma ushtarake “do të shkatërrojë më tej Ukrainën, duke bërë që më shumë ukrainas të vdesin për fajin e regjimit të Kievit”.

Përveç financimit për Ukrainën, Dhoma e Përfaqësuesve miratoi gjithashtu dispozita për të ripërdorur asetet e ngrira ruse të mbajtura në SHBA dhe për të devijuar paratë në Kiev.

Lexo po ashtu Dhoma e Përfaqësuesve e SHBA-së miraton “paketën e madhe” të ndihmës për Ukrainën

Ai tha se SHBA “do të duhet të përgjigjet” për këtë veprim, duke thënë se Rusia do ta bëjë këtë në një mënyrë që “i përshtatet më së miri interesave tona”.

Përveç këtyre, Peskov tha se masa do të shkaktojë “dëm të pariparueshëm” në imazhin e Amerikës.

Ndryshe, demokratët dhe republikanët u bashkuan pas muajsh bllokimi mbi mbështetjen e ripërtërirë amerikane për të ndihmuar Ukrainën të shmangë pushtimin rus.

E presidenti ukrainas Volodymyr Zelensky shkroi në Twitter duke thënë se ishte “mirënjohës” për vendimin, i cili tha se “e mban historinë në rrugën e duhur”.

Lexo po ashtu “Faleminderit, Amerikë!”: Reagon Zelensky, pasi Dhoma e Përfaqësuesve e SHBA-së miraton “paketën e madhe” për Ukrainën

Ai tha: “Demokracia dhe liria do të kenë gjithmonë rëndësi globale dhe kurrë nuk do të dështojnë për sa kohë që Amerika ndihmon për ta mbrojtur atë”.

Kujtojmë se presidenti i SHBA-së, Joe Biden kërkoi për herë të parë financimin në tetor, pasi furnizimet ushtarake të Ukrainës filluan të pakësohen.

Paketa tani do të shkojë në Senatin amerikan, ku ka të ngjarë të miratohet të martën. Biden më pas ka premtuar se do ta nënshkruajë atë menjëherë. /Telegrafi/