Miku i Rusisë zgjedhet presidenti i ri sllovak

Popullisti Peter Pellegrini është zgjedhur president i Sllovakisë, duke pasuar liberalen Zuzana Caputova.

Bëhet e ditur se 48 vjeçari ka mposhtur pro-perëndimorin dhe ish-diplomatin Ivan Korcok, duke fituar 53 për qind të votave.

Pellegrini është aleat i kryeministrit Robert Fico dhe së bashku kontrollojnë parlamentin, qeverinë dhe së shpejti edhe zyrën e presidentit, shkruan BBC, përcjell Telegrafi.

Ndryshe, Sllovakia ka qenë një nga shtetet mbështetëse të Ukrainës përpara se Fico të vinte në pushtet, me një zotim për të ndaluar furnizimin me rezerva ushtarake të ushtrisë sllovake në Kiev.

E tashmë edhe me Pellegrinin në krye të vendit, Ukraina ka humbur përfundimisht mbështetjen e një shteti të BE-së dhe NATO-s.

Kjo pasi kryeministri dhe presidenti i ri kanë bërë thirrje për t’i dhënë fund menjëherë mbështetjes perëndimore për Ukrainën, duke theksuar se anëtarësimi i saj në NATO do të shënonte fillimin e një lufte të tretë botërore.

Madje sipas tij, presidentin rus, Vladimir Putin, po e “djallëzojnë padrejtësisht”.

Qeverisja e Ficos është kundërshtuar nga opozita liberale pro-perëndimore që kur ai ka shfuqizuar Zyrën e Prokurorisë Speciale e cila u krijua 20 vjet më parë për të hetuar krimin ekonomik dhe korrupsionin e rëndë në vend.

Ndërkohë, Fico kohët e fundit i ka sytë kah transmetuesi publik i Sllovakisë, me plane për ta shfuqizuar institucionin dhe për ta zëvendësuar atë me një tjetër që e mban nën kontroll. /Telegrafi/