Finalet e muajit nëntor, Hysaj: Moldavia, skuadër e fortë, duhet ta menaxhojmë mirë

Kombëtarja Shqiptare do të luajë të premten e 17 nëntorit ‘finalen’ e parë të këtij muaji ndaj Moldavisë në transferim, e vlefshme për kualifikueset e Kampionatit Evropian ‘Gjermani 2024’. Futbollisti i Kombëtares, Elseid Hysaj doli sot (e martë) në konferencën për media, ku iu përgjigjën pyetjeve të gazetarëve lidhur me këto ndeshje. Fokusi kryesor është Moldavia deklaroi mbrojtësi.

Elseid Hysaj theksoi se dy sfidat e fundit janë si finale për Kombëtaren. Për sa i përket Moldavisë, mbrojtësi kuqezi vlerësoi ekipin moldav si një kundërshtar shumë të fortë, pasi ka pësuar vetëm një humbje. Më tej Hysaj tha se kjo fushatë kualifikuese ka qenë fantastike për kuqezinjtë dhe vlerësoi repartin e prapavijës.

Synimi në dy sfidat e fundit, 1 pikë apo më shumë? – Normal që janë dy finale për ne,  por duhet të mendojmë për Moldavinë. Është një ndeshje e rëndësishme dhe janë në skuadër shumë e fortë për momentin. Ne duhet të shkojmë atje për të mos humbur, sepse edhe një pikë mund të na nevojitet dhe jemi të kualifikuar, por do ishte bukur të fitonim dhe të arrinim rekordin e pikëve si Kombëtare.

Sfida me Moldavinë, a ngjason me Armeninë? – Kanë lidhje, por siç e dimë si ndeshje duket më e thjeshtë sepse na duhet vetëm një pike, por të themi të drejtën është një ndeshje me peshë, sepse në qoftë se fitojmë do të jemi të kualifikuar dhe mund të kthehemi me një gëzim të madh në Shqipëri ndërsa po humbëm do jetë një presion më shumë për ne dhe do të kthehemi në Shqipëri për të luajtur ndeshjen e fundit. Të gjithë ne jemi me një mendim për të shkuar të përgatitur dhe të fitojmë këtë ndeshjen, sepse duhet të kthemi me gëzim dhe ta shijojmë këtë sfidë.

Kritikat në drejtimin tuaj? – Kritika mund të kem sepse gjithë jetën kështu kam dëgjuar, por nuk është problem sepse  rëndësi kanë rezultatet dhe ku jemi. Kemi mundësi të shkojmë në Europian dhe të shkojmë në Gjermani kjo është më e rëndësishme, pastaj kritikat janë pjesë e lojës mund të vijnë  dhe do të jenë aty gjithmonë.

Shumë pranë kualifikimit. – Është një ndjesi e bukur kur kujtojmë ato momente të 2016, nuk mund t’i harrosh. Shpresoj që t’i shijojnë edhe djemtë e tjerë dhe ne bashkë me shokun tim të vjetër Berishën. Është një kënaqësi, duhet të shkojmë atje me vëmendjen e duhur dhe të vijmë me fitore në Shqipëri.

Në prag të dy sfidave jeni më të motivuar apo më shumë në presion? – Ne duhet të jemi të rritur në mentalitet, sepse nuk duhet ta shohim si presion. Duhet të jetë një mundësi për ne duhet ta shfrytëzojmë,  e dimë që do të jetë e vështirë, por ne punojmë për këto ndeshje dhe duhet të jemi gati.

Lexo po ashtu Berisha flet para dy finaleve të fundit: Fokusin duhet ta kemi në maksimum

Mbrojtja më e mirë që ka pasur Kombëtarja ? – Ne e kemi pasur gjithmonë mbrojtjen e fortë dhe në Europianin e kaluar. Por normal statistikat flasin vetë dhe nëse statistikat thonë që kjo është mbrojtja më e mirë dhe unë besoj të njëjtën gjë, është mbrotja më e mirë që kemi pasur ndonjëherë në Kombëtare.

Çfarë vlerësoni më tepër te Moldavia? – Është një skuadër që e kemi parë të gjithë, nuk ka pësuar asnjë humbje në shtëpi. Jemi të qartë që janë një skuadër që kundërsulmojnë dhe luajnë me kundërsulme por ne po përgatitemi për një ndeshje të tillë, ato do qëndrojnë në mbrojtje dhe ne duhet t’i gjejmë vetë mundësitë tona për t’i sulmuar dhe të jemi të kujdesshëm në mbrojtje në rastet kur ata kundërsulmojnë.

Një notë për sfidat kualifikuese? – Notën do ta japë pas ndeshjes me Moldavinë ose pas ndeshjes me Ishujt Faroe. Do të duhet të presim dhe pastaj do flasim prap bashkë dhe do ju jap notën.

/Telegrafi/