Grubi: Të gjithë e kanë të qartë se duhet të ndryshohet emri për integrim në NATO dhe BE (Video)

Deklaratat e Artan Grubit, shef i kabinetit të Ali Ahmetit, në një debat televiziv se është mundësi e mirë për ndryshimin e emrit, ka shkaktuar reagime të mëdha në opinion. Disa e kanë interpretuar si realizim direkt i Deklaratës së shqiptarëve, disa si tentim që shqiptarët po bëjnë presion për shkak se nuk mund të presin më shumë për integrimet euroatlantike, kur dihet se ekziston vetëm një pengesë, përcjell Telegrafi Maqedoni.

Artan Grubi në një debat televiziv u shpreh se rezultatet e tanishme në Kuvend janë mundësi e mirë për të sjellur konsenzus për çështjen e emrin, pasi sipas tij, asnjëra parti nuk mund ta bëjë këtë e vetme.

“Të gjithë që jemi këtu e dijmë, jo vetëm ne edhe Washingtoni dhe Brukseli e dijmë se nëse Maqedonia nuk e ndërron emrin në përputhje me kërkesat e Athinës, nuk mund të bëjë hapa konkret drejt NATO-s dhe BE-së. Emrin nuk mund ta ndryshojnë as BDI-ja, as Besa, as OBRM-PDUKM-ja vetë, as LSDM-ja vetë. Për emrin duhet të gjithë të arrijmë konsenzus dhe ndoshta kjo është mundësi e mirë, këto rezultate në Kuvend mund të na mundësojnë zgjidhje për çështjen e emrit”, deklaroi Grubi./Telegrafi/