“Squid Game” iu bën thirrje publike shikuesve: Ju lutem mos telefononi në numrin që iu shfaqet në serial

Platforma Netflix ka treguar se do të redaktojë skenat e serialit të tij të suksesshëm “Squid Game”, pasi një numër i madh shikuesish filluan të telefonojnë një numër telefoni që shfaqet në serial – e që në fakt është një numër rastësor që i përket një zonje të thjeshtë.

Seriali korean sjell në vëmendje qindra njerëz që po përjetojnë mjerimin e shkatërrimit financiar, të ftuar në një vend të pazbuluar ku luajnë lojëra të fëmijërisë në një përpjekje për të fituar një çmim miliarda dollarësh. Rregullat janë të qarta: Nëse humbet, vdes.

Kur personazhi i quajtur Gi-Hun merr një kartëvizitë për të shkuar te loja vdekjeprurëse, aty shfaqet një numër telefoni tetë-shifror. Ky numër, megjithatë, ndodh që i përket një gruaje nga Koreja e Jugut, e cila thotë se është bombarduar me thirrje dhe mesazhe nga të huajt që nga dita e parë kur u transmetua seriali.

“Unë kam marrë pa pushim telefonata dhe mesazhe 24/7 deri në atë pikë ku jeta ime e përditshme është bërë e vështirë”, tha Kim Gil-Young, një pronare e një dyqani të ëmbëlsirave që e ka përdorur atë numër për më shumë se 10 vjet.

Ajo shpjegoi se vërshimi i thirrjeve gjatë ditës dhe natës po e mbaronte baterinë e saj të celularit.

“Më është dashur të fshij më shumë se 4,000 numra”, tha ajo, duke shtuar se ajo ishte “mjaft e befasuar” nga e gjithë përvoja, e cila ka rezultuar në disa njerëz që e shajnë atë në telefon dhe të tjerët i tregojnë asaj për problemet e tyre financiare.

“Po përpiqem të marr pjesë në ‘Squid Game’, a është e mundur?”, shkruhet në disa prej mesazheve që i janë dërguar asaj.

Netflix tha të mërkurën: “Së bashku me kompaninë e prodhimit, ne po punojmë për të zgjidhur këtë çështje, përfshirë redaktimin e skenave me numrat e telefonit aty ku është e nevojshme”.

Të tjerët që ndajnë numra të ngjashëm telefoni gjithashtu kanë përjetuar të njëjtat probleme si gruaja nga Qarku Seongju në provincën Gyeongsang të Koresë së Jugut.

Një grua, numri personal i së cilës është vetëm dy shifra i ndryshëm nga ai i treguar në seri, i tha Wall Street Journal se kishte marrë telefonata të rastësishme që nga fillimi i serialit – disa nga Kolumbia.

Regjisori i serialit, Hwang Dong-hyuk, filloi të shkruajë skenarin e këtij seriali më shumë se një dekadë më parë. U deshën vetëm 10 ditë që seriali të ngjitej në pozitën e parë në 90 vende – duke e vënë atë në rrugën e duhur për t’u bërë programi më i shikuar i Netflix-it deri më sot.

“Ne kurrë nuk kemi parë asgjë të rritet aq shpejt dhe agresive sa ‘Squid Game’”, tha Minyoung Kim, nënkryetari i përmbajtjes së Netflix-it në disa vende, përfshirë Korenë dhe Azinë Juglindore.

Në rrjetet sociale, disa pyesnin sesi ishte e mundur që gjiganti i filmit të mos e kishte kontrolluar numrin ose të kishte përdorur një të rremë para publikimit të serialit.

“Ata në të vërtetë përdorën numrin real të dikujt?”, pyeti një përdorues, ndërsa shumë të tjerë shprehën simpati për ata që u kapën nga defekti.

Ndërkohë, të premten stafi realizues dhe ai i Netflixit përmes Washington Post, bënë një thirrje publike për fansat e serialit, që të mos i bien më numrit që iu shfaqet në serial dhe ta shqetësojnë pronaren e vërtetë të tij.

“Të dashur fansa të ‘Squid Game’, ju lutem ndaloni së telefonuari numrin që iu shfaqet në serial”, shkruhet në njoftim. /Telegrafi/

Dear ‘Squid Game’ fans, please stop calling the phone number shown in the series https://t.co/nrNg7FfK9E

— The Washington Post (@washingtonpost) October 8, 2021