Kosova me dy mundësi për kualifikim, por Shqipëria vetëm me një!

Tashmë është tërhequr edhe shorti për kualifikimet e Euro 2020.

Ndeshjet do të fillojnë në mars të vitit 2019 dhe kjo shihet si mundësia e vetme për kombëtaren shqiptare dhe të parën për përfaqësuesen e Kosovës.

Dy skuadrat e para të grupeve kualifikohen në Euro 2020.

Shqipëria është në Grupin H, një grup konsiderueshëm më i lehtë se sa i Kosovës.

Por, Shqipëria e ka këtë si shans të vetëm për kualifikim andaj duhet që të luftojë me Islandën e Turqinë si pretendentet për vendin e dytë, pasi Franca është favorite absolute në këtë grup. Në rast të eliminimit, Shqipëria nuk merr pjesë në Euro 2020.

Kosova në anën tjetër ëshë në Grupin A, ku kualifikimin do ta luftojë fillimisht në këto eliminatore, e ku ka Anglinë si super favorite dhe tri kombëtare tjera shumë të vështira për t’u mposhtur, si Mali i Zi, Bullgaria dhe Republika Çeke.

Kosova në rast se nuk kualifikohet do të ketë edhe një mundësi të dytë, për dallim nga Shqipëria.

Përfaqësuesja dardane për shkak se doli në vendin e parë të grupit në Ligën D të Ligës së Kombeve do të ketë edhe një mundësi të dytë nëse nuk arrin kualifikimin.

Kosova luan në playoffin e Ligës së Kombeve në mars të vitit 2020, ku fillimisht luan me Maqedoninë si mysafire, e më pas me fituesin e duelit Bjellorusi – Gjeorgji, e në rast të dy fitoreve, do të arrinte Kampionatin Evropian, Euro 2020.

Euro 2020 mbahet në 12 vende të ndryshme të Evropës, për herë të parë në histori. /Telegrafi/