Shoqata e të Drejtave të Pacientëve: Menaxhimi i COVID-19 po shkon drejtë humbjes së kontrollit

Shoqata e të Drejtave të Pacientëve në Kosovë (PRAK) ka reaguar pas vdekjes së 12 pacientëve dhe konfirmimit të 178 rasteve të reja me COVID-19, duke thënë se kjo tregon gjendjen faktike se institucionet shëndetësore nuk po arrijnë të menaxhojnë fluksin e pacientëve të prekur me këtë sëmundje të rrezikshme.

Siç thuhet në një komunikatë për media, 4 nga 12 pacientët e vdekur, kanë ndërruar jetë si rezultat i problemeve me oksigjen, por kjo mbetet të vërtetohet nga institucionet përgjegjëse.

PRAK kërkon nga drejtori i SHSKUK-së Basri Sejdiu që të jep dorëheqje ose të shkarkohet nga Bordi i SHSKUK-së për arsye morale dhe t’i jep hapësirë një hetimi të pavarur që do të ishte një satisfaksion moral për familjarët e viktimave.

Për më tepër, PRAK konsideron se masat e lirimit, të rekomanduara nga Instituti Kombëtar i Shëndetësisë Publike dhe të aprovuara nga Ministria e Shëndetësisë, kanë kontribuar që gjendja të bëhet e pa menaxhueshme.

“Kalimi nga masa rigoroze në masa tejet liberale pa u ngritur kapacitetet spitalore, ka kontribuar që institucionet të vijnë në prag të kolapsit. Është e pashpjegueshme që në kohën kur rriteshin rastet e konfirmuara me COVID-19 masat preventive liroheshin edhe më shumë. Edhe më vështirë e shpjegueshme është reduktimi i gjurmimit të kontakte të personave të prekur me COVID-19. Publiku nuk u informua asnjëherë se pse kishte disproporcion të rritjes së numrit të rasteve, lirimit të masave dhe reduktimit të testimeve, edhe pse ishin premtuar testime masive. Të vlerësosh se rekomandimet do të zbatohen nga qytetarë të cilët për 20 vjet s’kanë marrë edukim shëndetësor, është një iluzion, aq më tepër kur mbikëqyrja e respektimit të masave ka qenë minimale”, thuhet në komunikatë.

Arsyetimin e institucioneve të vendit për lirimin e masave për shkak të “shëndetit të ekonomisë”, PRAK e quan qasje të gabuar, duke thënë se vendi po kthehet në pikën zero ku “shëndeti i ekonomisë” dhe ai publik do të jenë seriozisht të rrezikuar.

Qeveria Hoti ka përgatitur një plan i veprimit ku në qytetet me numër të madh të të infektuarve si Prishtina, Prizreni, Ferizaj e Vushtrri do të kthehet masa e kufizimit të lëvizjes prej 21:00 deri në 5:00.

Qe nga 13 marsi, kur u paraqitën e rastet e para e deri më tash, në Kosovë janë konfirmuar 3356 raste me COVID-19, prej tyre 1874 të shëruar dhe 66 të vdekur.