Miratimi i Projektligjit për Rimëkëmbjen Ekonomike ka dështuar dy herë në Kuvendin e Kosovës, ndërkaq bizneset në vend po këmbëngulin që sa më parë të kalojë ky Projektligj.

Në mungesë të kuorumit, të enjten e kaluar deputetët e Kosovës sërish kishin dështuar të miratojnë Projektligjin për Rimëkëmbjen Ekonomike nga pandemia COVID-19. Në seancë kishin marr pjesë në votim vetëm 41 deputetë, ndërsa votimi për këtë Projektligj është bartur për seancën e radhës.

Ky Projektligj, po ashtu nuk kishte marrë votat në lexim të parë as në muajin gusht, pasi Lëvizja Vetëvendosje dhe Partia Demokratike e Kosovës refuzuan ta votojnë ndonëse ministrja e Financave, Hykmete Bajrami bëri thirrje për votimin e tij.

Përfaqësues të bizneseve kanë kërkuar që ky Projektligj të miratohet sa më parë, pasi sipas tyre, ka rritje të shpenzimeve të familjeve dhe bizneseve.

“Kuvendi dhe Qeveria duhet ta gjejnë formën që të arrihet një pajtueshmëri për temat kombëtare. Ky Projektligj duhet të miratohet sa më shpejtë. Po flas për shtatorin, pasi që është muaji kritik, sepse ka rritje të shpenzimeve për secilën familje edhe për bizneset në përgjithësi”, kishte thënë për Telegrafin, kryetari i Odës Ekonomike të Kosovës, Berat Rukiqi.

Në seancën e Kuvendit të mbajtur ditën e hënë, Partia Demokratike e Kosovës dhe Lidhja Demokratike janë përplasur lidhur me mos votimin e këtij Projektligji.

Deputeti i PDK-së, Memli Krasniqi tha se, kjo Qeveri nuk ka asnjë vullnet që ta miratojë këtë Projektligj, pavarësisht që opozita ka shpreh vullnet për bashkëpunim.

“Koalicioni qeveritar është i paaftë për me kaluar çfarëdo vendimi në Kuvend. Këta që janë sot në Qeveri kanë refuzuar me diskutuar për Pakon Financiare që i ndihmon qytetarët. Prej datës 7 prill nuk kanë qenë të gatshëm të diskutojnë për mundësinë për tejkalimin e situatës së rëndë të njerëzve duke ju mundësuar mi marr pagesat prej Qeverisë. Në muajt e fundit ka pasur vullnet prej opozitës, PDK-së veçanërisht që të gjejmë një rrugëdalje për t’i harmonizuar qëndrimet, asnjë vullnet s’ka ekzistua prej Qeverisë, veçanërisht LDK-së”, ka thënë Krasniqi, shkruan Telegrafi.

E pas kësaj deklarate, kishte reaguar shefi i Grupit Parlamentar të LDK-së, Arben Gashi, duke thënë se në tri seancat e fundit u ka bërë ftesë publike opozitës që t’i sjellin me shkrim propozimet që kanë dhe se ata do t’i marrin parasysh.

Po ashtu, kryetari i Grupit Parlamentar të Lëvizjes Vetëvendosje, Rexhep Selimi në seancën e Kuvendit të Kosovës ka thënë se, Qeveria nuk duhet të pret nga opozita që të sigurohen votat për ta kaluar këtë Projektligji.

“Numrat për ta votuar një Projektligj i keni, duhet t’i keni, nëse nuk i keni numrat për ta kaluar këtë, atëherë nuk i keni as për Qeveri. Qytetarët duhet ta dinë se për çfarë bëhet fjalë. Sepse kam përshtypjen se thirrja për ta votuar këtë Projektligj është më tepër për ta keq informuar qytetarin për situatën. Vetëm 31 vota nga 61 vota që duhet t’i ketë koalicioni, ka nevojë të kaloj ky Projektligj, pra vetëm 31 vota i duhen Qeverisë nga 61 që i ka, që do të duhej t’i kishte edhe prezent, nevojiten për ta kaluar këtë Projektligj. Këto 61 vota i gjetet për vete, e për qytetaret nuk po i gjeni. E keni mazhorancën e keni Qeverinë, atëherë kalojeni. Nga opozita nuk duhet t’i bëni që t’i bëni 31 vota nga 61”, është shprehur Selimi.

Kurse, shefi i Grupit Parlamentar të Aleancës për Ardhmërinë e Kosovës, Daut Haradinaj në seancën e fundit ka bërë thirrje tek të gjithë deputetët që të japin votën e tyre që Projektligji për Rimëkëmbjen Ekonomike të kalojë në lexim të parë.

Haradinaj ka thënë se Projektligji duhet të kalojë në lexim të parë e më pastaj mund të plotësohet.

“Është presion i madh publik që të futet në rend dite ky ligj, dhe kërkojmë që të kalojë në lexim të pare dhe pastaj kushdo që ka vërejtje dhe sugjerime, le ti inkorporojnë gjatë leximit të dytë, është mundësia e amendamentit”, ka thënë Haradinaj.

Me anë të këtij Projektligji parashihet zbatimin e Pakos së Rimëkëmbjes Ekonomike në vlerë prej 365 milionë euro. /Telegrafi/