Nga Austria vjen alarmi: Akullnajat e vendit do të zhduken pas 45 vjetësh

Akullnajat austriake do të zhduken pas 45 vjetësh, paralajmëroi të premten Klubi Alpin Austriak (OeAV), në raportin e tij të fundit të matjes së akullnajave që detajon tkurrjen e shpejtë të 93 akullnajave në Austri në dy vitet e fundit.

Sipas mediave të huaja, përcjell Telegrafi, më së shumti “u tërhoq” akullnaja e Pasterze me mbi 203 metra.

Akullnaja Rettenbachferner në Tirol doli e dyta, duke humbur 127 metra akull.

Dhe nga 93 akullnajat e vëzhguara, vetëm një nuk u tkurr më tej.

“De fakto në 40 deri në 45 vjet e gjithë Austria do të jetë pothuajse pa akull”, u tha gazetarëve në një konferencë shtypi në Salzburg, kreu i shërbimit të matjes së akullnajave, Andreas Kellerer-Pirklbauer.

“Ka kaluar koha” për akullnajat e Austrisë, njoftoi Gerhard Lieb i Klubit Alpin Austriak.

Vetëm nëse bora dhe akulli do të fillonin përsëri të formoheshin tani, akullnajat të paktën mund të ruanin madhësinë e tyre aktuale, shpjegoi Lieb, por “ju nuk mund t’i shpëtoni akullnajat austriake. më, sepse sistemet janë shumë të ngadaltë”.

Ekspertët thanë se ekzistenca e vazhdueshme e akullnajave të Austrisë varet tërësisht nga rezervat e akullit nga e kaluara.

Akullnajat janë masa akulli që formohen ndërsa bora dhe akulli “kompaktohen” gjatë shekujve.

Shkrirja e tyre është një nga treguesit më të dukshëm të ndryshimeve klimatike të shkaktuara nga njeriu, me akullnajat në mbarë botën që po zvogëlohen me shpejtësi. /Telegrafi/