Asllani: Humbja nga Kili na uli moralin, luaj kudo ku Kombëtarja ka nevojë

Kombëtarja e Shqipërisë ka pësuar humbjen e dytë nga po aq ndeshje në ndeshjet miqësore të muajit mars.

Kuqezinjtë e trajnerit Sylvinho janë mposhtur në Stockholm nga Suedia me rezultat minimal 1-0, por kësaj radhe kanë bërë paraqitje shumë më të mirë se katër ditë më parë.

Kristjan Asllani ishte një nga më të mirët në fushë, derisa pas ndeshjes ka folur për SuperSport duke thënë se duhet bërë ende shumë punë deri në Euro 2024.

Çfarë nuk shkoi te Shqipëria në këtë takim?

Vinim me moral të ulët, pasi humbëm me Kilin, ku bëmë një ndeshje të dobët. Sot besoj se bëmë shumë mirë dhe po punojmë shumë, pasi duam të arrijmë në formën më të mirë në Europian.

Lexo po ashtu Suedi 1-0 Shqipëri, notat e lojtarëve: Shkëlqejnë Strakosha, Gjimshiti dhe Mitaj

Në planin personal, cili është vlerësimi që i bën vetes në këto dy ndeshje?

Nuk di të them, pasi gjithmonë kam mundësinë të bëj diçka më tepër. Sot besoj se bëra shumë mirë, por vlerësimet ua lë gazetarëve. Unë dëgjoj opinionet e trajnerit dhe të ekipit, për t’u përmirësuar në të mirë të tyre.

U ndjetë mirë me modulin e sotëm?

Nuk ka problem, pasi mund të përshtatem në të gjithë rolet e mesfushës. Sot isha në qendër, rol që e bëj edhe te Interit dhe kisha pranë Laçin, që bën shumë kilometra. Jam gati të luaj kudo ku skuadra ka nevojë.