Këngëtari i muzikës ‘country’, Jake Flint ndërroi jetë vetëm disa orë pas martesës së tij

Këngëtari i muzikës ‘country’, Jake Flint, ka vdekur vetëm disa orë pasi u martua me gruan e tij, Brenda, gjatë fundjavës – njoftoi një zëdhënës.

Ai ndërroi jetë në moshën 37-vjeçare.

Clif Doyal i tha The Oklahoman se këngëtari i “Hard Livin” ndërroi jetë në gjumë pak pasi ai dhe Brenda u martuan.

Asnjë shkak i vdekjes nuk është bërë i ditur deri më tani.

“Jake Flint ishte një ambasador i skenës muzikore të Oklahoma Red Dirt. Ai ishte një autor këngësh, artist dhe interpretues i kërkuar live në të gjithë Midwestin dhe Jugperëndimin e SHBA-së. Si dëshmi e dashamirësisë dhe humanizmit të tij, ai ishte gjithashtu një mbështetës i palodhur i kolegëve të tij artistë, gjithmonë i gatshëm të jepte një dorë për të ndihmuar këdo kujt i duhej”, thuhej në deklaratën e Doyal.

“Me buzëqeshjen dhe sensin e humorit, ai ishte i dashur nga shumë njerëz dhe besoj se së bashku me muzikën e tij, do të jetë trashëgimia e tij e qëndrueshme”.

Brenda ndërkohë reagoi për vdekjen e bashkëshortit në një deklaratë të postuar në Instagram.

“Duhej të publikonim fotot e dasmës, por në vend të kësaj më duhet të zgjedh rrobat për të varrosur burrin tim” , shkroi ajo.

“Njerëzit nuk janë të destinuar të ndiejnë kaq shumë dhimbje. Zemra ime është shkatërruar dhe kam shumë nevojë që ai të kthehet. Nuk mund të duroj më shumë. Unë kam nevojë për të këtu”. /Telegrafi/