Ministrja franceze e Arsimit dërgoi djalin në një shkollë private, kritikohet ashpër – madje kërkohet dorëheqja e saj

Ministrja e re franceze e Arsimit ka shkaktuar ‘skandal’ në qeverinë e re të Gabriel Attal, pas akuzave se nuk ka dhënë arsyen e duhur për regjistrimin e fëmijëve të saj në shkolla private, shkruan Guardian.

Vetëm disa ditë pas emërimit të Amélie Oudéa-Castér, ajo po përballet me thirrjet për të dhënë dorëheqjen pasi pretendoi se “frustrimi” i saj për mungesën e mësuesve në shkollën shtetërore të djalit të saj të madh, ishte arsyeja që ajo e transferoi atë në një shkollë private.

Megjithatë, një ish-mësues i djalit të ministres tha se Oudéa-Castéra dhe burri i saj ndryshuan shkollën sepse institucioni refuzoi ta regjistronte djalin në vitin e kërkuar.

“Personalisht ndihem i sulmuar. Nuk kam munguar, edhe sikur të ishte kështu, sigurisht që do të ishte siguruar një zëvendësim”, tha mësuesja tashmë në pension nga ajo shkollë, i cili dëshiron të mbetet anonime.

Gazetari Nicolas Poincaré, djali i të cilit ndoqi të njëjtën shkollë shtetërore, e mbështeti ish-mësuesin, duke thënë për televizionin francez: “Në tetë vjet nuk ka pasur mungesë ku mësuesi nuk është zëvendësuar”.

Sot përfaqësuesit e sindikatës së mësuesve kërkuan një falje zyrtare nga Oudéa-Castéra, portofoli i së cilës përfshin jo vetëm arsimin, por edhe sportin dhe organizimin e Lojërave Olimpike të këtij viti në Paris.

Oudéa-Castéra mohoi artikujt e gazetës Libération, e cila zbuloi aferën, dhe bëri thirrje për t’i dhënë fund “sulmeve personale” kundër saj.

“Nuk dua të shkoj më tej në sferën e jetës personale dhe private. Ka shumë sulme të cilave jam përpjekur t’u përgjigjem sa më sinqerisht. Duhet ta mbyllim këtë kapitull”, tha ministrja.

Oudéa-Castéra, e cila ka tre fëmijë, fillimisht tha se e zhvendosi fëmijën e saj të madh në një shkollë private pas gjashtë muajsh në një shkollë shtetërore, sepse ajo dhe burri i saj, Frédéric, kryetari i grupit farmaceutik Sanofi, ishin të frustruar nga “ngarkesat e orët e humbura” për shkak të mungesës së pretenduar të mësuesve.

“Në një moment ne u lodhëm, si prindërit e mijëra familjeve që vendosën të kërkonin një zgjidhje tjetër”, tha ajo në komentet që tërhoqën një breshëri kritikash, derisa shtoi se “besonte në shkollat ​​publike”.

Shkolla Stanislas de Paris, ku ata zhvendosën djalin dhe dy fëmijët e tyre më të vegjël, është një shkollë e famshme private ku frekuentojnë, ndër të tjera, Princi Albert I i Monakos dhe gjenerali Charles de Gaulle. /Telegrafi/