Arrestohet 36-vjeçari në Gjilan, ia mori paratë një personi dhe nuk ia çoi veturën sipas marrëveshjes

Policia e Kosovës njoftoi të enjten se ka arrestuar një person në Gjilan, pasi dyshohet për veprën penale mashtrimi.

Sipas njoftimit, i dyshuari me inicialet A.B., 36-vjeçar kishte vënë në lajthitje një person pasi ia marrë një shumë të konsiderueshme të parave dhe nuk e kishte realizuar marrëveshjen e sjelljes së veturës.

“Drejtoria Rajonale e Policisë Gjilan, Njësiti i Hetimeve të Stacionit Policor Gjilan dhe Njësiti i Hetimeve të Stacionit Policor Mitrovicë falë një punë mirë të organizuar operacionale kanë arritur që të lokalizojnë dhe të arrestojnë personin e dyshuar A.B. (1986) i cili ishte nën kërkim policor nga Policia e Kosovës, Drejtoria Rajonale Gjilan për shkak të një rasti të mashtrimit i ndodhur në Gjilan”, thuhet në njoftimin e policisë.

“I dyshuari besohet se kishte konsumuar të gjithë elementet e veprës penale të mashtrimit duke vënë në lajthitje ankuesin me rastin e shtijës së një veture, ku viktima në llogarinë e të dyshuarit kishte deponuar një shumë të konsiderueshme të parave, ndërsa i dyshuari nuk kishte realizuar marrëveshjen e sjellës së veturës”.

I dyshuari pas arrestimit është intervistuar në bazë të procedurave ligjore.

Në lidhje me rastin është njoftuar Prokurori i Shtetit, i cili ka urdhëruar që ndaj të dyshuarit të ngritët kallëzim penal për veprën penale “Mashtrim” dhe ndaj të dyshuarit ka lëshuar masën e ndalimit për 48 orë. /Telegrafi/