Klubi i vogël i Serie A që po i jep zemër të madhe Italisë – Sassuolo me dy yjet e saj ka pushtuar zemrat e italianëve

Italia e nisi siç është më së miri Euro 2020 duke marr një fitore të madhe ndaj Turqisë me rezultat 3-0 të premten në mbrëmje.

Ciro Immobile, Lorenzo Insigne shënuan golat, ndërsa një autogol e shtoi Merih Demiral në fitoren e parë të Azurrëve.

Kur e shikon fillimisht formacionin e Italisë, bie në sy dyshja e Sassuolos, një klub i Serie A që nuk shquhet për suksese të mëdha.

Sassuolo ndeshjet i zhvillojnë në “Reggio Emilia”, ndërsa vijnë nga një qytet i vogël si Emilia-Romagna që ka vetëm 40,000 banorë.

Domenico Berardi dhe Manuel Locatelli luajnë te Sassuolo, dhe në ndeshjen hapëse ishin prej më të mirëve.

Berardi ishte shumë i përfshirë në pjesën e parë, megjithëse jo gjithçka që ai u përpoq të bënte doli si e mendoi, por në të dytën, ai shkëlqeu.

Ishte Berardi ai që pothuajse ishte autor i golit të parë në ndeshje, pasi kaloi një mbrojtës dhe lëshoi një top të fortë drejt zonës, ku ish-shoku i tij i ekipit te Sassuolo, Merih Demiral, e ktheu në gol.

Berardi dha një asistim të mirë edhe te Leonardo Spinazzola, që gjuajti por goditja e tij u prit nga portieri turk, ndërsa nga topi i kthyer Ciro Immobile shënoi.

Ashtu siç ka qenë ndër vite për Sassuolon, Berardi ishte njëri ndër lojtarët kryesorë edhe te Azzurrët.

Hiq më pak merita në fitore nuk kishte as Locatelli, i cili luante  në treshen e mesfushorëve italianë. Jorginho, Nicolo Barella dhe ai, pothuajse nuk gabuan asnjë pasim nga minuta e parë deri në minutën e fundit, duke bërë që shumë të mendojnë që ai mund ta zë pa problem vendin e Marco Verrattit.

Por kontributi i Sassuolos nuk do të mbarojë me kaq. Sulmuesi i ri Giacomo Raspadori është i përfshirë në listën e Mancinit për këtë turne dhe ai mund të paraqitet në ndeshjet në vazhdim. /Telegrafi/