AAK ende nuk ka marrë asnjë vendim për deputeten Reshitaj, Haradinaj: Vota e saj ishte pjesë e trafikimit të votave për Osmanin  

Kryetari i AAK-së, Ramush Haradinaj ka folur sërish për vendimin e deputetes Albena Reshitaj e cila mori pjesë në seancën për zgjedhjen e presidentes Vjosa Osmani.

Haradinaj ka thënë se vendimi i deputetes Reshitaj ishte pjesë e trafikimit të votave.

“Ne e shohim vendimin e deputetet Reshitaj si pjesë e procesit të trafikimit të votave nuk na vjen mirë. Si Aleancë kemi qenë të gatshëm me vendos marrëdhënie çfarëdo natyre për të ndihmuar formimin e institucioneve, por nuk ndihemi mirë kur zonja Reshitaj dhe të gjithë ne kemi kërkuar votë për Aleancën dhe veprimi individual ja ka pamundësuar Aleancës rolin e vet në ndërtim të institucioneve”, ka thënë Haradinaj.

Ai ka shtuar se zgjedhja e presidentes dhe fituesit e zgjedhjeve e kanë lënduar edhe fitoren e tyre por edhe të Kosovës.

“Zgjedhja e presidentes në këtë rast por edhe fituesit e rinj e kanë lënduar edhe futoren e tyre dhe të Kosovës me tri veprime. I pari ka qenë kërcënim, jepna votën ose ju dërgojmë në zgjedhje, i dyti ka qenë Ligji për zgjedhje që ka ardh natën dhe vetëm një zor të madh duhet me pas me trafiku një ligj të tillë bazik për demokraci, dhe i treti është trafikimi i votës”, ka thënë Haradinaj.

Lexo po ashtu Reshitaj: Vazhdoj të jem pjesë e AAK-së

Ai ka shtuar se nuk kanë marrë asnjë vendim të caktuar për deputeten Reshitaj.

“Nuk kemi marrë asnjë vendim për zonjën Reshitaj, dhe bindja ime është që edhe vota e saj ishte pjesë e trafikimit të votave për zgjedhjen e presidentes”, u shpreh Haradinaj. /Telegrafi/