Dy u larguan, por dy të tjerë u transferuan në Ligën Premier – kampionati më i fortë në botë flet shqip

Liga Premier njihet si kampionati më i fortë në botë, ku shumë yje të futbollit ëndërrojnë të luajnë në të.

Afati kalimtar veror ka përfunduar në kampionatin më të fortë në botë të enjten (8 gusht), ku shumë skuadra janë përforcuar me futbollist të rinj.

Edhe edicionin e ri në kampionatin anglez nuk do të mungojnë futbollistët shqiptarë.

Edicionin e kaluar në Ligën Premier ishin pesë futbollistë shqiptarë, Xherdan Shaqiri, Granit Xhaka, Shkodran Mustafi, Arijanet Muric dhe Florent Hadërgjonaj.

Mbrojtësi i Kosovës, Hadërgjonaj ka rënë në Championship me Huddersfildin dhe mbetën vetëm tre futbollistë shqiptarë, ndërsa portieri Aro Muric gjithashtu do të luaj në Championship si i huazuar nga Manchester City te Nottingham Forest.

Por në 24 orët e fundit të afatit kalimtar të verës, dy shqiptarë janë transferuar në Angli për ta ngritur në pesë përsëri numrin e futbollistëve shqiptarë.

Albian Ajeti e la gjigantin zviceran Basel për t’iu bashkuar skuadrës londineze West Ham United për një shumë rreth nëntë milionë euro.

Ndërkohë krejt në minutat e fundit të afatit kalimtar veror, Wolverhampton Wanderers u përkujdes për ta çuar në pesë numrin e futbollistëve shqiptarë në Ligën Premier.

Ujqërit arritën marrëveshje me Bayern Munichun për transferimin e yllit të ri kosovar, Meritan Shabani.

Liverpool, Arsenal, West Ham United dhe Wolverhampton Wanderers do të jenë skuadrat që kanë në radhët e veta futbollistë shqiptarë.

Sigurisht që këto ekipe do të kenë një simpati edhe nga shqiptarët anë e mbanë botës dhe arsyeja është Xherdani, Graniti, Shkodrani, Albiani e Meritani. /Telegrafi/

Xherdan Shaqiri – Liverpool

Granit Xhaka – Arsenal

Shkodran Mustafi – Arsenal

Meritan Shabani – Wolverhampton Wanderers

Albian Ajeti – West Ham United