Bulku: Kjo fitore duhej marrë me çdo kusht dhe çdo mënyrë

Ervin Bulku është dukur i buzëqeshur dhe i kënaqur me paraqiten e skuadrës dhe për fitoren e tij të parë si trajner i Shqipërisë. Kombëtarja kuqezi fitoi me rezultat 3-0 në udhëtim te Andorra dhe natyrisht se ky triumf e gëzon përzgjedhësin që e zëvendësoi Christian Panuccin e shkarkuar.

“Nuk kishte ndryshuar ndonjë gjë. Çunat treguan vlerat me rezultatin 0-3. Çdo rezultat tjetër, do ishte jo i përshtatshëm. Dhanë maksimumin. Treguan kualitetet. Jemi të bashkuar”.

“Me zgjedhjet që bëra, duhej të fusnim lojtarë që luajnë mirë me topin, luajnë shpejt, sepse duhej ta ndërronim sa më shpejt krahun, të gjenim hapësirat. Duhet ta bënim më shpejt golin e dytë, jo të zgjaste aq shumë. Mundësitë i kishim”.

Lexo po ashtu Shqipëria merr fitoren e parë në eliminatoret për Kampionatin Evropian, mposht Andorrën si mysafir

“Kjo fitore duhej marrë me çdo kusht, me çdo mënyrë. E thashë që rezultat i vetëm është fitorja. Padiskutim, edhe pikët janë të rëndësishme, por edhe morali, sepse kishim bërë edhe ndeshje të mira, por pa rezultate. Andorra ishte e dobët, por ka barazuar në fushën e vet”.

“Siç e thashë, dihet që në këto ndeshje të këtyre nivelit, ku ne e mendojmë se fitojmë lehtë, kemi gabuar në të shkuarën. Sot i kërkova çunave që jemi të detyruar ta fitojmë. Çdo gjë tjetër, është në dëmin tonë”, ka thënë Bulku për SuperSport.