Hoeness: Trajneri i Leipzigut, një kandidat për ne

Nëse nuk e mposht dot, blije!

Ky ligj i pashkruar në botën e futbollit është zbatuar shpesh nga Bayern në Gjermani, në përpjekje për të ruajtur hegjemoninë e vet.

Kjo zakonisht ka ndodhur me lojtarët, por duket se shumë shpejt rekordmenët do të rekrutojnë edhe trajnerin më “në modë” të Bundesligës.

Ai është Ralph Hasenhüttl, njeriu i cili po bën mrekullinë me RB Leipzig-un duke luftuar dhëmbë për dhëmbë me kampionët.

Aktualisht skuadra e tij udhëheq bashkë me Bayernin në tabelën e klasifikimit me të njëjtin numër pikësh.Në mesjavë Bayern do të presë për herë të parë RB Leipzig-un në “Allianz Arena” dhe presidenti Uli Hoeness ka sugjeruar që në të ardhmen tekniku austriak të drejtojë bavarezët.

“Ralph Hasenhüttl po punon mirë te RB Leipzig”, – tha Hoeness për revistën “Kicker”. “Nëse ndonjëherë do të kërkojmë për një trajner i cili flet gjermanisht, ai sigurisht që do të jetë një nga tre kandidatët tanë. Gjithsesi, për momentin nuk e kemi çështje për diskutim“, shtoi numri 1 i Bayern-it. Hasenhüttl ka kontratë deri në vitin 2019 në Leipzig.