Shuma marramendëse që pritet të shpenzojë Wenger në transferime

Ish-futbollisti i Arsenalit, John Hartson, është i bindur se Arsene Wenger do të shpenzojë shuma të majme parash për ta fituar Ligën Premier në sezonin e ardhshëm.

Strategu francez në të kaluarën ka qenë dorështrënguar gjatë afateve kalimtare, por në vitet e fundit gjërat kanë ndryshuar.

Dhe Hartson, i cili e ka bartur fanellën e Arsenalit gjatë viteve 1995-1997, beson se menaxheri i Topçinjve do të shpenzojë deri në 120 milionë funte (155 milionë euro) në transferime. Ai tashmë i ka siguruar shërbimet e mesfushorit shqiptar, Granit Xhaka, për të cilin ka paguar rreth 30 milionë funte (39 milionë euro).

“Ata tashmë e kanë blerë një lojtar të mirë si Xhaka. Ata kishin nevojë për një mesfushor qendror dhe kanë paguar afro 30 milionë funte për të, ndërsa këto janë paratë që tifozët e Arsenalit duan t’i shohin duke u shpenzuar për lojtarët më të mirë”.

“Mendoj se Arsene Wenger do të shpenzojë shumë para këtë verë. Pres që të shpenzojë ndërmjet 100 dhe 120 milionë funte dhe mendoj se do të jenë sfidues të vërtetë në sezonin e ardhshëm”, ka deklaruar Hartson për Metro.

Alvaro Morata, Robert Lewandowski e Gonzalo Higuain, janë disa nga emrat që lidhen me sulmin e Arsenalit. /Telegrafi/

Lexo më shumë: Lajmet e fundit nga Transferimet