VV: Nuk e pranojmë takimin e ri Thaçi-Vuçiq, Kosova ka nevojë për president të ri

Lëvizja Vetëvendosje ka mbajtur një konferencë për media lidhur me draftin  e Asociacionit.

Deputetja e kësaj lëvizje, Albulena Haxhiu ka thënë se ka pasur diskutime jo të qarta lidhur me ekipin menaxhues  gjegjësisht draftin e Asociacionit.

“Gjykata Kushtetuese ka konstatuar se 23 nene të Kushtetutës së Kosovës shkelen me marrëveshjen e Zajednicës. Ekipi menaxhues është ekip jo kushtetues. Çfarëdo dokumenti i prodhuar nga ky grup është jo-kushtetues dhe këtë duhet ta dijë edhe kryeministri që po bënë që nuk po merr vesh asgjë por edhe përfaqësuesja e lartë Federica Mogherini”, ka deklaruar Haxhiu.

Ajo ka theksuar se personat e ekipit menaxhues për Asociacionin, janë kundër Republikës së Kosovës dhe  janë aty me direktiva të Beogradit

Tutje Haxhiu shoti se Thaci nuk ka as legjitimitet dhe kredibilitet të na flasë për ndryshim të kufirit me Serbinë.

“Thaçi nuk duhet ta takoj më presidentin e Serbisë, Aleksandar Vuçiq pasi që Thaçi nuk ka mandat nga Kuvendi por poashtu nuk ka as mandat as nga populli për aventurat e tij. Takimi i paralajmëruar për në shtator është i papranueshëm për ne dhe si Vetëvendosje do ta kundërshtojmë atë”, ka thënë Haxhiu.

Në anën tjetër, deputetja Arbërie Nagavci ka theksuar  se një ide e tillë është e rrezikshme. Ajo u ka bërë thirrje institucioneve që të parandalojnë këtë, duke i hap rrugë zgjedhjeve të reja.

“Institucionet duhet të kërkojnë me ngulmë që Serbia të njoh menjëherë Republikën e Kosovës dhe të kërkojë falje për krimet e luftës dhe të shpreh gatishmërinë për të paguar dëm shpërblimet. Ajo që po deklarohet nga Hashim Thaçi është e rrezikshme. Shprehja e korrigjimit të kufijve që po e përsërit vazhdimisht këto ditë me intensitet të shtuar vende-vende në  Kosovë, duhet të trajtohet si tërësi dhe jo të ndara nga njëra tjetra.

E dini se kur është puna te deklaratat ai është i pari që po nxitë shqiptarët që të veprojnë. Të mos veprojë me shqiptarët e Luginës, si në rastin që veprojë me ushtarët e UCPMB-së në Preshevë. Ajo që është e padiskutueshme, Kosova ka nevojë për zgjedhje të reja. Është e domosdoshme që këto zgjedhje t’i hapin rrugë një Qeverie të re që do të punojë dhe angazhohet për një shtet të së drejtës që nuk e duron krimin dhe korrupsionin. Kosova ka nevojë për një president të ri”, ka thënë Nagavci. /Telegrafi/