Bie makina në lumin Drin, dy kushërinj të humbur

Kanë nisur kërkimet për mjetin që ka rënë në ujërat e lumit Drin. Teksa orët kalojnë, shtohet ankthi për fatin se dy kushërinjtë, Alfons dhe Paskualino Kolndrekaj përkatësisht 20 dhe 22 vjeç, rezultojnë të humbur).

Të afërmit bëjnë me dije se kanë humbur kontaktet me familjarët e tyre, që prej mbrëmjes së 24 dhjetorit, ndërkohë mësohet se ata kishin dalë për të festuar vigjiljen e Krishtlindjes, ndërkohë nga hetimet paraprake policia dyshohet se dy djemtë e xhaxhallarëve Alfonsi dhe Paskualino janë mbytur, raporton BalkanWeb.

Pjesëtarë të familjes Kolndrekaj kanë deklaruar në polici se dy djemtë janë nisur rreth orës 03:00 nga fshati për në qytetin e Shkodrës, dhe më pas kanë humbur çdo lloj kontakti me ta.

Në vendngjarje kanë shkuar dhe palombarët, të cilët po kërkojnë gjetjen e dy kushërinjve nga fshati Stajkë i komunës së Bushatit, të cilët dyshohen të kenë mbetur brenda në makinë. Operacioni i kërkimit dje u ndërpre për shkak të errësirës , ndërkohë që thellësia e lumit Drin vështirëson kërkimin.

Ngjarja dje

Një automjet ka dalë nga rruga nacionale Shkodër- Tiranë dhe ka rënë në ujërat e lumit Drin. Burime zyrtare nga Drejtoria e Policisë së këtij qarku pohojnë se ngjarja ka ndodhur në orët e para të mëngjesit të djeshëm në vendin e quajtur "Kthesa e Beltojës".

Mësohet se një makinë tip "Golf 4" me ngjyrë blu, në të cilin udhëtonin Alfons dhe Paskualino Kolndrekaj, përkatësisht 20 dhe 22 vjeç (rezultojnë të humbur) është përplasur me parmakun e urës së Beltojës dhe më pas ka rënë në ujërat e lumit Drin. Menjëherë në vendngjarje ka mbërritur policia, e cila ka nisur kryerjen e hetimeve. /Telegrafi/