Nga Maloku te Thaqi, Ramadani e Giovanni – formacioni më i mirë i xhiros së shtatë në Albi Mall Superligë

Ka përfunduar xhiro e shtatë në Albi Mall Superligë, xhiro që qenë shumë interesante dhe ka pasur përballje të forta.

Llapi e njoftoi Suharekën me humbje duke e mposhtur 3-0, derisa fitore morën edhe pretendentët për titull si Ballkani që triumfoi ndaj Ferizajt 4-0 dhe Drita që arkëtoi pikët e plota në Klinë pasi mposhti Dukagjinin 0-2.

Gjilani ka marrë fitore ndaj Prishtinës me përmbysje 2-1, derisa pikën e parë e ka fituar Feronikeli ’74 pas barazimit me Malishevën 1-1.

Telegrafi Sport si gjithmonë sjell formacionin më të mirë të xhiros, ku kësaj radhe vije me sistemin 4-3-3.

Portieri:

Nëse Drita ka arritur të fitoj në Klinë merita më e madhe është e Faton Malokut. Portieri gjilanas bëri pritje jashtëzakonisht të mira duke e mbajtur portën e paprekur në fitoren 0-2.

Mbrojtësit:

Armend Thaqi është rikthyer me stil në një ndeshje që starton nga minuta e parë në futbollin kosovar. Mbrojtësi anësorë ishte fantastik ndaj Prishtinës me depërtimet e tij, por edhe me një asistim fantastik në fund për fitoren 2-1.

Në qendër të mbrojtjes vijnë dy mbrojtës golashënues në këtë xhiro, por që ishin fantastik edhe në defensivë.

Agon Xhaka realizoi golin e vetëm për Malishevën, derisa ishte fantastik në ndërhyrjet e tij në qendër të mbrojtjes. Ndërkohë vend në formacionin e javës zë edhe Besir Ramadani që ka kapur kulmin e formës këtë edicion me Gjilanin. Ramadani përveç që shënoi golin e fitores 2-1, ishte fantastik në defensivë duke ndalur shumë aksione të mysafirëve.

Krahu i majtë i mbrojtjes mbulohet nga Arbër Bytyqi i Llapit. Prizrenasi ishte fantastik për 69 minuta sa qëndroi në fushë me ndërhyrjet e tij, por ai shpesh herë dilte edhe në ofensivë duke bërë harkime të rrezikshme në zonë.

Mesfusha: 

Mesfushorë që kanë qenë vendimtar këtë javë për klubet e tyre janë në formacionin më të mirë. Kushtrim Shabani udhëhoqi Gjilanin për një rikthim ndaj Prishtinës duke shënuar golin e barazimit fillimisht, por ai shkëlqeu në mesfushë me topa të rikuperuar, duke ndërtuar aksione e duke bërë pasime shumë të mira.

Vend në formacionin e javës zë edhe Arbnor Ramadani që ishte më i miri te Llapi në fitoren 3-0 ndaj Suharekës. Ramadani shkëlqeu në mesfushë përballë mysafirëve, derisa për të kompletuar një ndeshje spektakolare shënoi golin e fundit në ndeshje.

Giovanni ka qenë padyshim ylli i javës së shtatë në Albi Mall Superligë. Braziliani ishte i papërmbajtshëm ndaj Ferizajt me dy gola spektakolar, por edhe gjatë gjithë takimit shkëlqeu me stilin e tij unik.

Sulmuesit:

Armend Gashi do të mbahet gjatë në mend në Drenas, pasi u desh që të kalojnë shtatë xhiro që Feronikeli ’74 të siguroj pikën e parë. Gashi u inkuadrua nga banka rezervë dhe doli vendimtar duke shënuar gol në frymën e fundit për Niklin.

Në qendër të sulmit është Sunday Adetunji që më në fund duket se është zhbllokuar te Ballkani. 26-vjeçari realizoi dy gola ndaj Ferizajt duke konfirmuar formën e mirë të tij.

Një ‘rezervist’ ka qenë vendimtar edhe në fitoren e Dritës 0-2 në udhëtim te Dukagjini. Kastriot Selmani u inkuadrua nga banka rezervë për ta ndryshuar krejtësisht rrjedhën e lojës pasi shënoi golin e parë për 0-1. Inkuadrimi i Selmanit në fushë i dha dinamikë lojës së Dritës që ka marrë tre pikë të mëdha në një udhëtim të vështirë.

Trajneri i javës: 

Ky epitet shkon për Ardian Nuhiun e Gjilanit. Skuadra e tij e pa vetën në disavantazh 0-1 nga Prishtina, por u rikthyen dhe në fund e fituan ndeshjen. Sigurisht që edhe zëvendësimet nga Nuhiu bënë që ritmi i ndeshjes të mos bie në asnjë moment nga vendasit të cilët arkëtuan tre pikë të mëdha. /Telegrafi/