Gazeta amerikane “The New York Times” i kërkon të tërhiqet nga gara presidenciale – vjen reagimi i ekipit të fushatës së Joe Biden

Bordi redaktues i The New York Times i ka bërë thirrje Joe Bidenit të tërhiqet nga gara presidenciale e vitit 2024 pas një debati të vlerësuar si katastrofik kundër Donald Trump.

Performanca e dobët e Biden i futi demokratët kryesorë në panik të enjten mbrëma, pasi presidenti i SHBA-së u shfaq i lëkundur dhe në disa pika pati vështirësi për të përfunduar fjalitë, shkruan The Guardian, përcjell Telegrafi.

Ai përforcoi frikën për moshën dhe aftësinë e tij për detyrën që shpresohej se “debati do t’i lehtësonte”.

Menjëherë pas debatit, demokratë të lartë, duke përfshirë zëvendëspresidenten, Kamala Harris, pranuan “fillimin e ngadaltë” të Biden, por theksuan “përfundimin e tij të fortë”, ndërsa të tjerë privatisht sugjeruan që ai të tërhiqej.

Dhe në një lëvizje që do të shtojë presionin e mëtejshëm mbi Shtëpinë e Bardhë, bordi editorial i New York Times tha në një artikull opinioni të premten se “shërbimi më i madh publik që [Biden] mund të kryejë tani është të njoftojë se ai nuk do të vazhdojë të kandidojë për rizgjedhje”.

“… Biden nuk është njeriu që ishte katër vjet më parë”, citohet të jetë thënë në shkrim.

Ish-presidenti amerikan Barack Obama mbrojti Biden në një postim në rrjetet sociale të premten.

“Ndodhin netë të këqija debati”, tha ai. “Por këto zgjedhje janë ende një zgjedhje mes dikujt që ka luftuar për njerëzit e zakonshëm gjatë gjithë jetës së tij dhe dikujt që kujdeset vetëm për veten e tij”.

Ndërsa në një ndalesë të fushatës në Karolinën e Veriut të premten, Biden u shfaq shumë më energjik dhe koherent. Ai e pranoi performancën e tij të debatuar gjerësisht.

“Unë nuk eci aq lehtë sa dikur, nuk flas aq mirë sa dikur, nuk debatoj aq mirë sa dikur”, tha Biden. “Por unë e di atë që di. Unë di të them të vërtetën”.

New York Times është bërë gazeta e parë amerikane që i bëri thirrje Bidenit të largohej nga gara, por botime të tjera me ndikim, duke përfshirë Wall Street Journal, Financial Times dhe Atlantic, kanë botuar shkrime nga kolumnistët e tyre kryesorë që i bëjnë thirrje Bidenit të “largohet mënjanë”.

Në përgjigje të thirrjes së NYT, bashkë-kryetari i ekipit të fushatës së Bidenit, Cedric Richmond tha për CNN: “Herën e fundit që Joe Biden humbi miratimin e bordit editorial të New York Times, doli shumë mirë për të”.

Biden dhe Trump janë “kokë më kokë” në sondazhet kombëtare.

Një sondazh i New York Times/Sienna i publikuar këtë javë përpara debatit zbuloi se Trump kishte një epërsi prej tre pikësh ndaj Bidenit.

Në shtetet e “fushës së betejës” që janë kyçe për të fituar Shtëpinë e Bardhë, Trump është përpara në gjashtë nga shtatë, sipas RealClearPolling. /Telegrafi/