“Ende asnjë aktakuzë për sulmin terrorist në Banjskë”, “Nuk është çështje e tij” – përplasjet mes Kurtit e Isufajt e betimi i ushtarëve të rinj – lajmet që shënuan javën

Javën që po lëmë pas kishte një përplasje verbale ndërmjet kryeministrit të Kosovës, Albin Kurti dhe kryeprokurorit Blerim Isufajt.

Derisa Kurti theksoi se edhe tre muaj pas sulmit terrorist në Banjskë, Prokuroria ende nuk ka ngritur asnjë aktakuzë, Isufaj të premten në një konferencë për media tha se kjo çështje nuk është e Kurtit dhe sipas tij Prokuroria ngrit aktakuza kur ka prova.

Ndërkaq, po të premten u mbajt ceremonia e betimit të ushtarëve të rinj.

Tre muaj nga sulmi terrorist në Banjskë, Kurti shpreh shqetësimin pse prokuroria nuk ka ngritur ende asnjë aktakuzë

Kryeministri i Kosovës, Abin Kurti është shprehur i shqetësuar pse prokuroria nuk ka ngritur ende asnjë aktakuzë për sulmin terrorist në Banjskë, ku u vra rreshteri Afrim Bunjaku.

Kurti para mediave ka thënë se tre muaj pas sulmit terrorist, prokuroria ende nuk ka ngritur asnjë aktakuzë, transmeton Telegrafi.

“Ka pa numër fakte, dëshmi, pra të mjaftueshme për të ngritur aktakuza, Ky vit ishte vit i sulmeve kriminale, ka shpërputhje midis informacionit, fakteve dhe aktakuzave në anën tjetër. Dhe, ky hendek nuk mund të mbushet nga Qeveria, i takon Prokurorisë, unë jam për të ndihmuar, dhe ata për të punuar”, theksoi kryeministri.

Kryeministri në një konferencë për media ka dhënë detaje të reja mbi sulmin terrorist që ndodhi në Banjskë.

Ai po ashtu ka paralajmëruar se Serbia po planifikon sulme të reja ndaj vendit tonë.

U kritikuan nga Kurti se nuk po ngrisin aktakuza për sulmin në Banjskë, kryeprokurori Isufaj thotë se nuk është çështje e kryeministrit

Prokuroria Speciale ka mbajtur të premten konferencën vjetore, ku ka folur kryeprokurori Blerim Isufaj.

Kryeprokurori Isufaj u pyet nga gazetarët lidhur me kritikat e kryeministrit Albin Kurti pse ende nuk ka asnjë aktakuzë lidhur me sulmin që ka ndodhur në Banjskë, transmeton Telegrafi.

Isufaj u shpreh se prokuroria ngrit aktakuza kur ka prova, dhe se kjo çështje nuk i takon kryeministrit Kurti.

“As nuk dua të komentoj, nuk është çështje e tij. Ne i ngrisim aktakuzat kur kemi prova, nuk mundet askush të na tregojë kur të ngrisim aktakuza”, pohoi ai.

Shtetit iu shtuan edhe 325 ushtarë të rinj

Në kazermën “Skënderbeu” në Ferizaj, të premten u mbajt ceremonia e betimit dhe certifikimit për 325 ushtarët e rinj të Forcës së Sigurisë së Kosovës, të gjeneratës 02-2023.

Në këtë ceremoni morën pjesë presidentja e vendit, Vjosa Osmani, kryeministri Albin Kurti, ministri i Mbrojtjes, Ejup Maqedonci, komandanti i FSK-së, gjenerallejtënant Bashkim Jashari, komandanti i KFOR-it, gjeneral Federico Bernacca, ushtarakë ndërkombëtarë, si dhe zyrtarë të lartë të Ministrisë së Mbrojtjes, oficerë të lartë të FSK-së, drejtues komunalë dhe familjarë të ushtarëve të rinj.

Para ushtarëve, udhëheqësit e shtetit u shprehen krenar me ushtarët e rinj.

Presidentja Osmani në fjalimin e saj tha se ushtarët filluan rrugëtimin me shumë sfida për mbrojtjen e atdheut.

“Ndjehem e lumtur që në këtë ceremoni të veçantë ndajmë së bashku emocionet e festës dhe kurorëzimit të suksesit të madh të 325 djemve e vajzave tona të gjeneratës 2023 të Forcës së Sigurisë së Kosovës. Të dashur ushtarë jam krenare që sot do të mbani uniformën e forcave tona jam krenare që jeni trashëgimtarë të Ushtrisë Çlirimtare të Kosovës. Duke filluar rrugëtimin tuaj me plot sfida në mbrojtjen e atdheut tonë të dashur republikës së Kosovës, ju duke përvetësuar mësime dhe trajnime jeni formësuar dhe zhvilluar në ushtarak dhe karakter që përvetësojnë idealet e shenjta të detyrës nderit dhe atdheut, të ndërlidhura me vlerat dhe standardet me të larta të ushtarakëve të vendeve anëtare të NATO-s”, tha Osmani.

Osmani duke iu drejtuar ushtarëve bëri thirrje për besnikëri ndaj detyrës për mbrojtjen e atdheut. /Telegrafi/