“Kam pasur marrëveshje me Real Madridin, Guardiola më donte te Barcelona”, Pirlo zbulon disa të pathëna

Legjenda e Italisë, Andrea Pirlo ka zbuluar se kishte nënshkruar një kontratë me Real Madridin në vitin 2006 pas skandalit Calciopoli, ndërsa Pep Guardiola e thirri atë në Barcelonë disa vite më vonë.

Ish-mesfushori i Milanit dhe Juventusit konfirmoi në një intervistë për Radio Serie A se kishte nënshkruar një kontratë pesëvjeçare me Los Blancos në vitin 2006, disa javë pasi u bë kampion i Kupës së Botës me Italinë.

“Kupa e Botës sapo kishte përfunduar dhe kishte gjithë rrëmujën e Calciopolit. Kishte një shans që Milani të luante në Serie B dhe Fabio Capello ishte transferuar te Real Madrid. Unë kisha folur me të dhe me drejtorët dhe ne patëm një marrëveshje”, ka zbuluar fillimisht Pirlo.

“Kur mbërrita për parasezonin e Milanit, ata na thanë se do të luanim në Serie A me një zbritje pikë, nuk isha i sigurt sepse kisha vendosur të shkoja atje [Real Madrid], por duke u kthyer në Milanello takova Adriano Gallianin dhe agjentin tim dhe ne ramë dakord për të vazhduar aventurën”.

“Galliani e hodhi kontratën në tavolinë dhe na tha të vendosnim shifrat, pas disa ditësh e firmosëm”.

Nuk ishte hera e vetme që Pirlo mund të transferohej në Spanjë pasi Barcelona gjithashtu u përpoq ta nënshkruante atë disa vite më vonë.

Milani i Pirlos po luante kundër katalanasve në Trofeo Gamper në vitin 2010 dhe kuqezinjtë ishin në bisedime për të nënshkruar me Zlatan Ibrahimovic nga Barça.

Pirlo zbuloi se ai foli me Pep Guardiolën brenda zyrës së tij pas ndeshjes.

“Kishte një shans që Milani të nënshkruante me Ibrën dhe Guardiola pyeti nëse isha në dispozicion për t’iu bashkuar tij te Barcelona. Ne folëm për një kohë në zyrën e tij, por më pas erdhi Ibra dhe qëndrova gjithashtu në Milano”.

“Guardiola më tha se do të donte të më kishte atje. Ai më njihte sepse kishte luajtur në Brescia edhe pse nuk kishim luajtur bashkë. Unë isha shumë krenar që u ula në zyrën e tij dhe më thirri, edhe nëse asgjë nuk ndodhi në fund”.

#Pirlo: '#Guardiola mi voleva al #Barcellona, avevo già firmato un contratto con il #Real #Madrid' #calciomercato #Milan #RealMadrid https://t.co/qvpJBNxu0x pic.twitter.com/U9aJDG1qCi

— calciomercato.com (@cmdotcom) December 6, 2023

Nëse Pirlo do të kalonte Camp Nou, katalanasit do të luanin me Xavi, Andres Iniesta dhe Pirlon në mes të fushës.

“Do të ishte mjaft teknike, ishte edhe Sergio Busquets. Do të kishte qenë një përvojë e bukur, por në fund, isha në Milan me shumë kampionë të tjerë, kështu që isha i lumtur”, përfundoi italiani.

Ish-reprezentuesi italian u largua përfundimisht nga Milani në fund të kontratës së tij në vitin 2011, duke iu bashkuar Juventusit të Antonio Contes. Ai kaloi katër vjet në Torino, duke shënuar 19 gola në 164 ndeshje me Zonjën e Vjetër. /Telegrafi/