Rikthim i çmendur në “Wembley” – Anglia siguron kualifikimin në EURO 2024

Kombëtarja e Anglisë ka ‘prerë’ biletën për në EURO 2024 pas fitores me rezultat 3-1 ndaj Italisë në ndeshjen e zhvilluar në “Wembley”.

Ishin mysafirët ata që dolën të parët në avantazh kur në minutën e 15-të Gianluca Scamacca shërbehet mjaft mirë në zonë nga Giovanni Di Lorenzo për të çuar topin në rrjetën e Pickford për 0-1.

Anglia barazoi shifrat në 1-1 në minutën e 32-të , ku penalltinë e fituar nga Jude Bellingham e konkretizoi në gol Harry Kane.

Deri në përfundim të pjesës së parë nuk pati raste të mira shënimi dhe dy skuadrat shkuan në pushim mes pjesëve me rezultat të barabartë.

⏸️ An exciting half comes to an end ⚖️#ENGITA #Azzurri #VivoAzzurro pic.twitter.com/UrUUJSbtHw

— Italy ⭐️⭐️⭐️⭐️ (@Azzurri_En) October 17, 2023

“Tre Luanët” e nisën fuqishëm pjesën e dytë ku arritën të shënojnë golin e epërsisë për 2-1 në minutën e 57-të përmes Marcus Rashford, i cili me një goditje tejet precize e lë në ‘gjumë’ Gianluigi Donnarumman i cili nuk mundi të bëjë asgjë në atë rast.

Goli i tretë dhe ai që vulosi fitoren e Anglisë, u shënua në minutën e 77-të ku edhe kësaj radhe protagonist për anglezët ishte Harry Kane i cili u tregua i pagabueshëm në një rast ballë për ballë me portierin (3-1).

#EURO2024 qualification: secured 🙌

The #ThreeLions are heading to Germany next summer! pic.twitter.com/cduT7U0K8Z

— England (@England) October 17, 2023

Me këtë fitore Anglia edhe matematikisht ka siguruar kualifikimin për në Evropian, ndërsa Italisë i janë vështirësuar punët pasi që tani ata renditen në pozitën e tretë në grupin C me tri pikë më pak se Ukraina por me një ndeshje më pak të zhvilluar.

Muajin e ardhshëm Italia do ta ketë përballë Ukrainën dhe siç duket në atë sfidë do të vendoset se kujt do t’i takojë vendi i dytë dhe plasmani për në EURO 2024./Telegrafi/