Arrestohet koreano jugori në Aeroportin e Tiranës, i akuzuar për krijim të skemave piramidale në nivele ndërkombëtare

Policia e Tiranës ka njoftuar sot përmbylljen e një operacioni të koduar “Pritja”, për kapjen e një shtetasi të shpallur në kërkim ndërkombëtar.

Operacioni “Pritja” ishte rezultat i bashkëpunimit të ngushtë ndërmjet FAST Albanias, Interpol Tiranës, Policisë Kufitare të Rinasit dhe Drejtorisë Vendore të Policisë Tiranë.

Policia e Tiranës ka arrestuar në afërsi të aeroportit të Rinasit, një 61-vjeçar nga Koreja e Jugut, i akuzuar për krijim të skemave piramidale në nivele ndërkombëtare.

61-vjeçari po priste në afërsi të aeroportit, bashkëshorten që po vinte nga Dubai në Tiranë.

Ekipi i FAST Albania, në bashkëpunim me Policinë Kufitare të Rinasit dhe Drejtorinë Vendore të Policisë Tiranë, organizuan operacionin dhe bënë të mundur kapjen e personit të shumëkërkuar.

Ai akuzohet se së bashku me persona të tjerë kanë përvetësuar rreth 28 milionë euro përmes skemave piramidale.

“U arrestua shtetasi: S. M., 61 vjeç, pasi Gjykata e Seoulit, Koreja e Jugut, me vendimin e datës 24.10.2022, i ka caktuar masën e sigurisë “Arrest në burg”, për veprën penale “Mashtrimi në rrethana rënduese”, parashikuar nga Kodi Penal i Koresë së Jugut.

Shtetasi S. M., në bashkëpunim me disa shtetas të tjerë, ka ndërtuar një skemë piramidale në nivele ndërkombëtare, e cila supozohej se shpërblente investitorët, për blerjen e paketave të reklamave dhe rishitjen e tyre tek përdoruesit e rinj.

Gjatë periudhës 27 mars 2016 – 7 nëntor 2020, këta shtetas kanë mashtruar 2156 shtetas, me një dëm në vlerë monetare totale 40,703,930,904 KRW (monedha e Koresë së Jugut) ose rreth 28,000,000 euro”, njofton policia. /Telegrafi/