Rrëfimi i Neymarit dhe synimi i tij befasues përtej Kupës së Botës “Katar 2022”

Neymari dhe Paris Saint-Germain po përgatiten për përballjen e Ligue 1 këtë të diel kundër Auxerre, që do të jetë ndeshja e fundit para Botërorit të Katarit.

Braziliani do të jetë një nga yjet e mëdhenj të Kupës së Botës dhe po hyn në top formë. Ai është lideri i kombëtares së Brazilit dhe shpreson të sjellë në shtëpi trofeun për vendin e tij.

Këtë sezon ai është bërë ylli që PSG-ja e dëshironte aq shumë, me disa gola dhe asistime që e kanë bërë atë vendimtar për klubin në pronësi të sheikëve të Katarit.

Në moshën 30-vjeçare, Neymar të kujton më shumë lojtarin që e ka shijuar aq shumë futbollin e tij te Barcelona.

Megjithatë, në një intervistë për gazetën braziliane ‘O Globo’, Neymar nuk beson se ky është sezoni i tij më i mirë.

“E nisa mirë sezonin, por të gjitha sezonet e mia me PSG-në kanë qenë të mira, nëse shikoni numrat. Ndryshimi është se kam pasur lëndime serioze në sezonet e fundit dhe kam qenë jashtë për një kohë të gjatë, gjë që më trishton”, ka thënë fillimisht Neymar.

Në Brazil, aspekti më i spikatur i kësaj interviste është se ai thotë se mund të luajë Botërorin e tij të fundit në Katar.

“Do të luaj sikur të ishte e fundit. Le të luajmë çdo ndeshje sikur të ishte e fundit sepse nuk e dimë nesër çfarë ndodh. Nuk mund të garantoj se do të luaj një Botëror tjetër, sinqerisht nuk e di”.

Një tjetër sfidë e Neymarit në Katar, përveç fitimit të trofeut, do të jetë edhe tejkalimi i Peles.

Sipas shifrave të FIFA-s, Neymar është tre gola larg Peles si golashënuesi më i mirë në historinë e kombëtares braziliane. Ndërsa Neymar ka 75 gola, Pele ka 77.

“Pele është futbolli. Pele është praktikisht gjithçka për vendin tonë. Respekti dhe admirimi që kam për të është i madh”, shtoi sulmuesi brazilian.

Synimi i Neymar përtej Kupës së Botës

Sigurisht, në mendjen e Neymar është fitimi i trofeut me kombëtaren braziliane. Dhe, me siguri, pas Kupës së Botës ai ka sfidën për të fituar Ligën e tij të parë të Kampionëve me PSG-në.

Kjo mund ta sjellë atë më afër fitimit të Topit të Artë, diçka që nuk e ka arritur kurrë në karrierën e tij. Por në këtë intervistë në O Globo shihet një Neymar më i thellë.

“Më pëlqen të luaj futboll, më pëlqen të fitoj. Më pëlqen të jem më i mirë seç jam çdo ditë. Më pëlqen të ndihmoj shokët e skuadrës, kjo është gjëja kryesore”.

“Shpresoj që emri im të jetë i gdhendur në historinë e futbollit. Nëse jo në futboll, atëherë në jetën e dikujt”, përfundoi ylli i PSG-së.

Lavdia pret një Neymar që ëndërron të vazhdojë të shijojë futbollin, si me kombëtaren e Brazilit ashtu edhe me PSG-në. Futbolli me siguri do të jetë mirënjohës. /Telegrafi/