Publikoi një hetim mbi abuzimet në Çeçeni, ‘sulm kimik’ në zyrat e gazetës hulumtuese në Moskë – pronar i saj është edhe Mikhail Gorbachev

Gazeta hulumtuese ruse “Novaya Gazeta” tha të hënën se një substancë kimike e paidentifikuar u gjet në hyrje të zyrave të saj në Moskë.

“Në mëngjes, një sulm kimik u krye në ndërtesën ku ndodhet redaksia jonë”, ka thënë në një deklaratë kryeredaktori i saj, Dmitry Muratov, shkruan Euronews, përcjell Telegrafi.

Substanca kimike është aktualisht nën analizë nga shërbimi rus i sigurisë FSB, tha Muratov.

Hetimi i Sirisë

Incidenti vjen ndërsa tri OJQ-të ngritën një proces gjyqësor të hënën kundër grupit mercenar rus Wagner mbi torturat dhe vrasjen e një të burgosuri në Siri.

Muratov vuri në dukje në deklaratë se çështja ishte “bazuar në artikujt tonë”.

Ndryshe, në vitin 2019, Novaya Gazeta publikoi një hetim për atentatin.

Imazhet treguan burra rusishtfolës duke goditur viktimën e tyre me një çekiç dhe më pas duke e copëtuar atë, duke e spërkatur përfundimisht me benzinë dhe duke i vendosur flakën trupit të tij.

Gazeta publikoi gjithashtu të hënën një hetim mbi abuzimet e kryera në Çeçeni.

Republika autonome në rajonin e Kaukazit drejtohet nga udhëheqësi autoritar Ramzan Kadyrov.

Precedente të shumëfishta

Sipas Euronews, përcjell Telegrafi, “Novaya Gazeta” dhe gazetarët e saj janë përballur me sulme të shumta që nga krijimi i gazetës në vitin 1993.

Në vitin 2006, gazetarja Anna Politkovskaya u qëllua me armë në hyrjen e bllokut të saj të banesës në Moskë.

Ajo po hetonte presidentin rus Vladimir Putin dhe taktikat e Kremlinit në Çeçeni.

Në vitin 2018, një kurorë funeralesh dhe një kokë e prerë dhie u lanë jashtë zyrave të gazetës hetimore me një shënim ku shkruhej: “Për kryeredaktorin e Novaya Gazeta”.

Gazeta është në pronësi të personelit të saj editorial, manjatit të biznesit Alexander Lebedev dhe ish-udhëheqësit sovjetik, Mikhail Gorbachev. /Telegrafi/