Këto janë profilet e ministrave të LDK-së në Qeverinë Kurti

Kuvendi i Kosovës mbajti sot seancë plenare, ku u zgjodh Qeveria e re e Kosovës, e cila do të udhëhiqet nga Albin Kurti në koalicion me Lidhjen Demokratike të Kosovës.

Qeveria Kurti pritet t’i ketë 2 zëvendëskryeministra, 15 ministra dhe 33 zëvendësministra.

Ndarja e posteve është bërë në atë mënyrë që 6 ministri të udhëhiqen nga LDK-ja, ndërsa po ashtu të ketë edhe zëvendës-ministrin e parë.

Zëvendës-kryeministrit i parë në Qeverinë Kurti, është emëruar nga radhët e Lidhjes Demokratike të Kosovës, i cili i takoi ish-shefit të grupit parlamentar të kësaj partie në legjislaturën e kaluar të Kuvendit të Kosovës, Avdullah Hotit.

LDK-ja në marrëveshjen e koalicionit me Lëvizjen Vetëvendosje, gjithashtu u pajtua të marr edhe gjashtë ministri: Ministrinë e Infrastrukturës, Ministrinë e Punëve të Brendshme, Ministrinë e Mbrojtjes, Ministrinë e Arsimit, atë të Kulturës dhe të Bujqësisë.

Këto janë profilet e të emëruarve të LDK-së, në poste qeveritare në Qeverinë Kurti:

Avdullah Hoti – Zv. kryeministër i parë

Avdullah Hoti, i lindur më 04 shkurt 1976 është politikan, i cili ishte kandidatë në koalicion për kryeministër në zgjedhjet  parlamentare në Kosovë të 2017. Ai ka shërbyer si Ministër i Financave në mes të vitit 2014 dhe më 2017 në koalicionin qeverisës PDK/LDK. Hoti është profesor i rregullt në fakultetin e Ekonomisë në universitetin e Prishtinës, që nga viti 1998 dhe ligjëron lëndët Makroekonomi I dhe Makroekonomi II. Nga 1999 deri ën vitin 2004 ishte hulumtues në Institutin Riinvest në Prishtinë.  Ishte kryeredaktor i Revistës Kontabiliteti Bashkëkohor, botuar nga Shoqata e Kontabilistëve të Çertifikuar dhe Auditorëve të Kosovës.  Nga gushti 2006 deri në vitin 2007 ishte këshilltar i lartë në Ministrinë e Arsimit, Shkencës dhe Teknologjisë. Kurse, nga janari 2008 deri në 2009 ishte këshilltar për ekonomi i Kryetarit të Prishtinës, kurse. Nga janari 2010 deri në 2013 ishte nënkryetar i Komunës së Prishtinës.

Lumir Abdixhiku – Ministër i Infrastrukturës

Lumir Abdixhiku, i lindur më 22 prill 1983, është politikan nga radhët e Lidhjes Demokratike të Kosovës. Abdixhiku përfundoi studimet universitare në Universitetin e Prishtinës, në vitin 2006 ka marrë titullin magjistër shkence në Universitetin e Staffordshire të Britanisë, në fushën e Moralit fiskal. Në vitin 2013 ai ka marrë titullin doktor shkence i ekonomisë, nga Universiteti Staffordshire, pas katër vjetëve hulumtimi e kërkimi në fushën e determinantëve të evazionit fiskal të bizneseve në vendet e tranzicionit. Abdixhiku gjithashtu është edhe drejtor ekzekutiv i Institutit “Riinvest”. Ai i është bashkuar Institutit në vitin 2005 dhe që nga atëherë është i angazhuar në disa projekte kërkimore, të avokimit e zhvillimit – në Kosovë dhe jashtë saj.

Agim Veliu – Ministër i Punëve të Brendshme

Agim Nuhi Veliu, ka lindur më 25.07.1960. Është nga fshati Bradash, Podujevë dhe me profesion është jurist. Veliu flet shqip, anglisht dhe serbokroatisht. Është i martuar dhe baba i 2 fëmijëve.

Agim Veliu është një ndër themeluesit e Degës së LDK-së në Podujevë, prej 1990 në poste udhëheqëse të Degës së LDK-së, më 1998 deputet i Kuvendit të Republikës së Kosovës, në vitin 2000 zëvendëskryetar i bordit Administrativ, ishte kryetar i kryetar i Kuvendit të komunës së Podujevës nga viti 2000 deri 2002, po ashtu gjatë viteve 2002 – 2004, ndërsa u zgjodh ministër i Arsimit, i Shkencës dhe i Teknologjisë në vitin 2004 deri në vitin 2007. Ishte deputet i Kuvendit të Republikës së Kosovës 2008 –2009. Pastaj për dy mandate ishte kryetar i komunës së Podujevës gjatë viteve 2010-2013 dhe  2014-2017, e deri në vitin 2020, pra tani ku u zgjodh ministër i Punëve të Brendshme.

Anton Quni – Ministër i Mbrojtjes

Anton Quni ka lindur ne fshatin Fshaj të Gjakovës me 09.06.1967. Familja e tij shumë herët u zhvendos për të jetuar në Prizren. Ai është i martuar dhe ka katër fëmijë. Ka studiuar në Akademi Ushtarake dhe është graduar si Oficer i karrierës. Gjatë luftës së fundit në Kosovë, ai braktisi Zvicrën për të ju bashkuar Ushtrisë Çlirimtare të Kosovës. U rreshtua në UÇK nën komandën e kolonel Ahmet Krasniqi. Me njësinë e tij, zhvilloi operacione të suksesshme ushtarake në thyerjen e kufirit shqiptaro-shqiptar në Koshare. Anton Quni, përkrah Agim Ramadanit, Salih Çekajt, Xhemajl Fetahajt, e ushtarakëve të tjerë mori pjesë në fitoren historike kundër ushtrisë serbe në Betejën e Koshares, që njihet si Beteja që tmerroi armikun.

Pas lufte, Antoni ka shërbyer në TMK dhe FSK. Më pas në kabinetin e Presidentit të Kosovës, Fatmir Sejdiu, si përgjegjës për Sigurinë Kombëtare. Nga viti 2010, Anton Quni, ka qenë deputet në Parlamentin e Kosovës. Quni është i emëruar që nga sot Ministër i Mbrojtjes.

Hykmete Bajrami – Ministre e Arsimit

Hykmete Bajrami ka lindur me 20.01.1975 në Pejë, ndërsa jeton në Prishtinë. Është e martuar, nënë e dy vajzave. Ajo është profesorëshe në Universitetin e Prishtinës, në fakultetin Ekonomik, ka përfunduar gjimnazin “Bedri Pejani” (1991-1995), pastaj përfundoi fakultetin Ekonomik në UP, (1996-2000), ndërsa ishte gjithashtu pjesë e Staffordshire University, (2003-2004), Studimet e Doktorates i përfundoi në Fakulteti Ekonomik-UP, (2006-2011).

Besian Mustafa – Ministër i Bujqësisë

Besian Mustafa është i lindur më 14 gusht 1984 në lagjen Dardania në Prishtinë ku edhe përfundoi shkollën fillore. Arsimin e mesëm e filloi në Gjimnazin “Sami Frashëri” në Prishtinë, për ta përfunduar në Illinois në Amerikë. Vazhdoi studimet universitare në dy drejtime, financa dhe kontabilitet, në La Roche University në Pittsburgh, Pennsylvania, dhe masterin në administrim biznesi në Neë York City.

Përvoja profesionale: Zëdhënës i LDK-së, mbi 7 vjet pozita menaxheriale në banka, në Investime dhe Menaxhim të Riskut, ku ka menaxhuar portfolio prej 360 milion euro, 3 vjet kryeshef ekzekutiv në Agjencinë për Promovim të Investimeve në Qeverinë e Kosovës, mbi 600 milion euro investime të huaja në Kosovë gjatë kësaj periudhe, bashkë me USAID dhe KfË, ka themeluar Fondin për Garanci Kreditore që ka rritur kreditimin e ndërmarrjeve të vogla dhe mesme për 100 milion euro, mbi 5 vjet ligjërues i ekonomisë në Staffordshire University, AAB dhe Riinvest, është anëtar Bordi në fondacionin e bamirësisë të themeluar nga Dua Lipa “Sunny Hill Foundation”. Ndërsa nga sot, është emëruar ministër i Bujqësisë në Qeverinë Kurti.

Vlora Dumoshi – Ministre e Kulturës

Vlora Dumoshi ka lindur në vitin 1966. Është nënë e dy djemve dhe jeton në lagjen “Dardania”, në Prishtinë. Dumoshi ka qenë në postin e Drejtoreshës në Drejtorinë për Kulturë në Komunën e Prishtinës, gjatë udhëheqjes së Isa Mustafës në Komunën e Prishtinës. Vlora Dumoshi, nga LDK-ja, e cila u emërua sot në postin e Ministres për Kulturë në Qeverinë Kurti, e cila u formua në koalicion me LDK-në. Ajo ka punuar si profesoreshë ne Fakultetin e Filologjisë. /Telegrafi/