Lideri përballet me Gjilanin në Drenas, Prishtina luan te KEK-u

Java e 22-të në elitën e futbollit kosovar ka nisur me dy fitore të skuadrave vendase.

Kampioni në fuqi i Kosovës, Drita ka mposhtur para adhuruesve të vet Ferizajn me rezultat minimal 1-0, ndërsa Llapi ka triumfuar 3-1 ndaj Trepçës ’89.

Të dielën (sot), do të zhvillohen edhe katër takime të tjera të javës së 22-të.

Ndeshja më interesante pritet të jetë ajo mes liderit aktual Feronikelit dhe Gjilanit.

Industrialistët vinë në këtë takim pas barazimit në kryeqytet me Prishtinën, ndërsa Gjilani në katër ndeshjet e stinorit pranveror ende nuk e ka shijuar fitoren duke pësuar dy disfata dhe duke barazuar në dy të tjera.

Prishtina që po lufton për titullin e kampionit udhëton drejt Obiliqit për tu përballur me KEK-un e fundit në tabelë.

Ndërkohë interesant pritet të jetë edhe në Prizrenin e bukur, ku Liria pret Drenicën.

Ndeshja e fundit e kësaj jave do të zhvillohet në kryeqytetin kosovar, më saktësisht në stadiumin Fadil Vokrri.

Flamurtari do të jetë nikoqir i Ballkanit në takimin që pritet të fillojë nga ora 17:30. /Telegrafi/