Xhaferi-Ruçi: Do të punohet për thellimin e bashkëpunimit ndërmjet dy shteteve

Kryetari i Kuvendit të Republikës së Maqedonisë, Talat Xhaferi, në suaza të Konferencës së kryetarëve të Parlamenteve të vendeve të Ballkanit Perëndimor, që mbahet në Budapest, u takua me Gramoz Ruçin, kryetarin e Kuvendit të Republikës së Shqipërisë.

Në takim, kumtoi Kabineti i kryetarit të Kuvendit të Maqedonisë, të dy bashkëbiseduesit shprehën kënaqësi për nivelin e lartë të marrëdhënieve dypalëshe ndërmjet dy vendeve dhe shprehën pritje se bashkëpunimi parlamentar, si mënyra më e lehtë e bashkëpunimit ndërmjet vendeve, do të vazhdojë të avancohet dhe të intensifikohet, si në nivelin e grupeve të deputetëve për bashkëpunim, ashtu edhe ndërmjet komisioneve parlamentare, me ç’rast kryetari i Kuvendit të Republikës së Shqipërisë e përsëriti ftesën për vizitë të Xhaferit në Republikën e Shqipërisë.

Gjatë takimit, bashkëbiseduesit u pajtuan se me formimin e qeverive në të dy vendet, hapen mundësi të reja për thellim të mëtutjeshëm të bashkëpunimit ndërmjet dy vendeve, në të gjitha fushat, veçanërisht në fushën e bashkëpunimit ekonomik, të cilin qytetarët në realitet edhe e ndjejnë më së shumti.

Në fund të takimit, të dy bashkëbiseduesit e përshëndetën nxjerrjen e ligjit për minoritetet, të miratuar nga ana e Kuvendit të Republikës së Shqipërisë. Njëkohësisht, kryetarët ndanë edhe bindjen e përbashkët dhe pritjen se bashkëpunimi dypalësh ndërmjet dy parlamenteve do të vazhdojë edhe në të ardhmen me një ritëm edhe më intensiv, me çka të dy parlamentet do të kenë mundësi që së afërmi të këmbejnë mendime dhe përvoja nga puna parlamentare, politika ndërkombëtare dhe çështje të tjera aktuale./Telegrafi/