Arsyet pse Ronaldo është favorit për Topin e Artë (Foto)

Cristiano Ronaldo është favoriti kryesor për ta fituar Topin e Artë dhe këtë epitet ia shton fakti që u bë heroi i Real Madridit në finalen e Ligës së Kampionëve.

Në përballjen ndaj Atletico Madridit, portugezi kishte marrë instruksione tjera nga trajneri Zinedine Zidane duke e ndryshuar mënyrën e lojës, megjithatë penaltia e tij ishte vendimtare në fund për trofeun e 11-të të Los Blancos (‘Undecima’) në garën më të madhe evropiane për klube dhe njëherësh, ai e fitoi për të tretën herë këtë kompeticion në karrierën e tij.

Edhe këtë vit, ‘numri 7’ arriti shifra mahnitëse. Përkundër, ngritjeve dhe rënieve të skuadrës, 31-vjeçari i ka shënuar 51 gola me klubin e tij këtë vit: 35 në La Liga dhe 16 në Evropë.

Kjo statistikë e bën atë lojtarin e vetëm në histori që shënon mbi 50 gola në gjashtë sezone radhazi. Asnjë lojtar i Barcelonës, madje as ‘Këpuca e Artë’, Luis Suarez, nuk mund t’i bëjë konkurrencë Ronaldos në garën për lojtarin më të mirë të vitit.

Madje, sipas Marcas, edhe në Camp Nou e konsiderojnë portugezin si favoritin kryesor për ta marrë trofeun në muajin janar.

Edhe bastexhinjtë pajtohen me faktin se superylli i Realit është favoriti aktual. Shpesh, fituesi i Topit të Artë është ai që i fiton garat më të rëndësishme, ndërsa Ronaldo e ka fituar më të rëndësishmen – Ligën e Kampionëve.

Padyshim se kanë mbetur edhe disa muaj deri kur do të përfundojnë votimet, ashtu që asgjë nuk është përfundimtare. Për këtë arsye, ai duhet të luajë mirë edhe në Kampionatin Evropian për t’ia shtuar vetes akoma më shumë gjasat që të shpallet më i miri.

Si kapiten dhe lojtar kryesor i Portugalisë, Ronaldo e di se çfarë duhet të bëjë në ‘Euro 2016’. /Telegrafi/