Për herë të tretë në gjykatë, për të njëjtën akuzë (Video)

Martin Coli sërish ka dalë para Gjykatës për t’u gjykuar lidhur me akuzën për vrasje në tentativë. Kjo është hera e tretë që Coli deklarohet rreth fajësisë, pasi që rastin e tij Gjykata e Apelit e ka kthyer dy herë në rigjykim.

Coli dhe djali i tij Bekimi akuzohen se pas një mosmarrëveshjeje kanë tentuar t’i privojnë nga jeta Rrustem Isafin dhe djalin e tij Rilindin nga Beci i Gjakovës.

Para se Coli të deklaronte pafajësinë, prokurori i Prokurorisë Themelore në Gjakovë, Agron Matjani, e lexoi aktakuzën.

“I pandehuri së bashku me djalin e tij i cili gjendet në arrati, kanë përgatitur planin dhe kanë pritur të dëmtuarit në pusat e fshatit Bec. I pandehuri Martin ka goditur me kmesë në dorën e djathtë dhe në shpinë të dëmtuarin Rrustem dhe pastaj e godet në kokë duke i shkaktuar çarje të kafkës e të cilat dëmtime kanë qenë serioze dhe të rrezikshme për jetën e tij…”, tha mes tjerash prokurori Matjani.

Sipas aktakuzës së ngritur nga Prokuroria e atëhershme e Qarkut në Pejë, rasti kishte ndodhur me 30 maj të vitit 2009. /kallxo/