Sot zhvillohen tri ndeshjet e shtyra të javës së 15-të në BKT Superligën e Kosovës

Sot (e enjte) do të zhvillohen tri ndeshjet e javës së 15-të në BKT Superligën e Kosovës të parapara të luheshin gjatë të mërkurës.

Gjatë të martës janë zhvilluar dy ndeshjet e para të javës së 15-të, me Prishtinën që fitoi 2-0 ndaj Feronikelit dhe Dukagjinin e Ulpianën që luajtën baras 1-1.

Të mërkurën ishin në orar për t’u zhvilluar edhe tri ndeshjet tjera, por shpallja ditë zie në këtë ditë shkaku i vdekjes së 46 shqiptarëve nga Maqedonia e Veriut në aksidentin me autobus në Bullgari, bëri që ndeshjet të shtyhen.

Lexo po ashtu Ditë zie në Kosovës për viktimat shqiptare nga Maqedonia e Veriut, shtyhen tri ndeshjet e javës së 15-të në BKT Superligë

Megjithatë, këto tri ndeshje pritet të zhvillohen gjatë ditës së sotme dhe secili takim pritet të jetë më interesant se tjetri.

Padyshim se vëmendja dhe ndeshja kryesore pritet të zhvillohet në “Stadiumin e Qytetit” në Gjilan, ku ekipi i kuq me emrin e qytetit e pret rivalin e urryer lokal, Dritën.

Ndeshje interesante pritet të zhvillohet edhe në Skenderaj, ku Drenica në kërkim të pikëve pas tri humbjeve e pret Llapin në formë në ndeshjen që zhvillohet në “Bajram Aliu”.

Takimi i fundit, por jo nga rëndësia do të luhet në Suharekë, ku vendasit e Ballkanit duan medoemos fitore ndaj Malishevës.

Të tri ndeshjet pritet të fillojnë nga ora 13:00. /Telegrafi/