Shala i PDK-së: Kriza është bërë praktikë si dhe mbijetesë e kësaj qeverie

Ferat Shala nga Partia Demokratike e Kosovës (PDK) gjatë fjalës së tij në Kuvendin e Kosovës, iu drejtua me disa pyetje kryeministrit Albin Kurti, rreth punës së tij në krye të qeverisë.

Shala tha se në këtë seancë në vend që të flisnin për fillimin e vitit të ri shkollor, ata janë duke debatuar për raportet e qeverisë me sindikatat, grevën në arsim, për mos komunikimin e kryeministrit me sindikalistët, etj.

Shala tutje tha se kriza është bërë praktikë si dhe mbijetesë e kësaj qeverie.

“Sot fatkeqësisht po debatojmë për raportet e qeverisë me sindikatat, grevën në arsim, për mos komunikimin e kryeministrit me sindikalistët, etj. Sot po fyejmë dhe denigrojmë mësuesit, ata të administratës publike. Dje fyet dhe çlirimtarët e vendit. Kriza tashmë është praktik, është bërë mbijetesë e kësaj qeverie dhe këtij kryeministri”, tha ai duke shtuar se” Komunikimi është parim njerëzor dhe shoqërore, e kur s’ka komunikim çka mbetet pastaj. Andaj kryeministër ktheju komunikimit me sindikalistët…Ktheju debateve me shoqëri civile”.

Ai i bëri një sërë pyetjesh Kurtit, për punën e tij si udhëheqës i qeverisë.

“Pse nuk na thua katër pesë punë që ke kryer në sektorin e sigurisë, apo të arsimit? Pse kryeministër s’na ke treguar katër – pesë detyra që ke kryer për energji, në procesin e planifikimit hapësinor, apo në sektorin e mjedisit? Na i thuaj katër – pesë punë kapitale, na i përmend katër – pesë projekte për diasporën? Na thuaj ndonjë njohje për Kosovën?”, pyeti Shala.

Deputeti i PDK-së po ashtu tha se ka përjetuar shkollën edhe në tenda, por siç tha ai momente më mospërfillëse dhe fyese nuk ka parë ndonjëherë.

“Kam përjetuar shkollën edhe në tenda. Por kështu me këtë përçmim, e fyerje nuk kam parë moment më të rëndë e më mospërfillës. Cila është e vërteta? Vendose masën e dhunshme në arsim si në shëndetësi dhe u kry muhabeti. Zgjidhe krizën, ktheji nxënësit në shkollë. Ndale se ti e ke nis kryeministër grevën. Ti e ke obligim kushtetues me i pri procesit, e jo me kriju situata të tilla”, ka thënë Shala. /Telegrafi/