Reuters: Maqedonia do të huazojë 300 milionë euro me kamatë prej 5,875%

Maqedonia do të përpiqet të marrë hua në vlerë prej më së paku 300 milionë euro përmes obligacionit shtatë vjeçar me normë interesi prej 5,875%, ka publikuar Reuters, duke u thirrur në burimet e veta, transmeton Telegrafi Maqedoni.

Kamata është më e lartë se sa ajo për euro obligacionin paraprak e cila u anulua dhe kamata e të cilës parashihej të ishte 5%. Megjithatë sipas asaj që shkruan Reuters, shuma prej 300 milionë eurosh mund të mos jetë përfundimtare dhe huamarrja të shkojë edhe deri në 500 milionë euro.

Euro obligacioni përsëri u ofrua pas anulimit të së enjtes së kaluar pas një letre të Kire Naumov, ish zëvendësministrit plotësues për financa nga radhët e LSDM.

Ndërmjetës për euro obligacionin janë bankat e njëjta – City Group, Deutsche Bank, Ertse Group dhe Societe General.

Përndryshe sot lideri i LSDM, Zoran Zaev sërish dërgoi një letër deri te bankat dhe mediat botërore me të cilën siç thotë ai, i ka përkujtuar për procedurën e paligjshme për emetimin e euro obligacionit.

Nga OBRM-PDUKM në pushtet nga ana tjetër thonë se euro obligacioni paraqet mekanizëm normal financiar i cili zbatohet në të gjitha vendet evropiane./Telegrafi/