Në Gjermani pas ligjit të ri për punëtorët e kualifikuar, kush punon në të zezë rrezikon shumë

Ligji i ri i migracionit të fuqisë punëtore të kualifikuar, vazhdon ta mbajë derën të mbyllur për punëtorët me trajnime më të shkurtra se dyvjeçare ose me vetëm përvojë pune.

E vetmja zgjidhje për ta është Rregullorja e Ballkanit Perëndimor.

Në një intervistë për Deutsche Wellen, drejtori i Rrjetit të Bizneseve Shqiptare në Gjermani, Mustafë Abazi, shpjegon se si funksionon kjo rregullore.

Deutsche Welle: Zotëri Abazi, para se të nisim bisedën, na thoni dy fjalë për kompaninë tuaj.

Mustafë Abazi: Unë, prej tashmë 15 vjetësh, drejtoj një kompani që merret kryesisht me suvatime të brendshme dhe punime të jashtme, sidomos me fasadimin e objekteve.

Deutsche Welle: Cilat janë kualifikimet që kërkohen në zanatin tuaj?

Mustafë Abazi: Në Gjermani ka vërtet një mungesë të madhe të punëtorëve të kualifikuar, edhe në ndërtimtari. Prej vitit 2016 ekziston mundësia e ardhjes në Gjermani me vizë pune nga Shqipëria dhe Kosova, me Rregulloren e Ballkanit Perëndimor, dhe besoj se ka ardhur një numër shumë i madh dhe shumë të tjerë janë në pritje.

Deutsche Welle: A duhet të jenë të kualifikuar këta persona?

Mustafë Abazi: Mirë është të kenë një kualifikim, së paku njohuri pune. Por ne kemi punësuar edhe njerëz pa njohuri fillestare, dhe kemi arritur me stafin tonë që t’ua mësojmë punën. Por është shumë e rëndësishme që ata që duan të vinë këtu, të kenë së paku përvojë pune në vendet prej nga vijnë,

Deutsche Welle: Që ta sqarojmë, ju e keni fjalën gjithnjë për Rregulloren e Ballkanit Perëndimor. Po ligji i ri gjerman për imigrimin e fuqisë punëtore të kualifikuar që hyri në fuqi më 1 mars të këtij viti u jep përparësi personave me kualifikim së paku dyvjeçar. A ka në Shqipëri dhe Kosovë kualifikime të këtij lloji në profesionin tuaj?

Mustafë Abazi: Ka, edhe në Shqipëri dhe në Kosovë, kemi shkollat e zanatit (në Shqipëri shkollat profesionale). Diploma nga këto shkolla është një lehtësim i madh për ata që duan të vijnë. Atyre mund t’u rritet edhe paga. Megjithatë, për ne mjaftojnë edhe njerëz me përvojë pune, edhe pa pasur një certifikatë të tillë.

Deutsche Welle: Por këtyre u duhet një kontratë që të marrin vizë pune, apo jo?

Mustafë Abazi: Gjithsesi. Ata duhet të lidhin kontratë me punëdhënësit e këtushëm. Kontrata shkon në zyrën e punësimit dhe ata shikojnë se a ka gjermanë, që janë pa punë, apo njerëz nga Evropa, dhe nëse nuk ka kandidatë të tjerë për këtë vend pune, atëherë Zyra e Punës e lejon edhe një kontratë për dy-tre vjet. Me këto letra nga Zyra e Punësimit, ata mund të shkojnë në Ambasadë në Shqipëri apo Kosovë, dhe të marrin një vizë pune për Gjermani.

Deutsche Welle: Por pritja është shumë e gjatë. Cilat janë arsyet?

Mustafë Abazi: Ne kemi një masë shumë të madhe të komunitetit shqiptar në Gjermani.Ndoshta ka pasur edhe keqpërdorime të vizave. Por edhe ka pasur shumë vetë që kanë përfituar nga ky rregull, deri tani afërsisht 20 mijë.

Deutsche Welle: Ndërkohë të tjerët vijnë si turistë dhe nisin punën në mënyrë ilegale. Çfarë risku marrin ata përsipër?

Mustafë Abazi: Ne si punëdhënës nuk guxojmë t’i punësojmë se dënimet janë shumë të mëdha. Shkojnë nga 10 mijë deri në 100 mijë euro, nëse një punëtor kapet në të zezë. Dhe, veç kësaj, atyre do t’u bëhet nga një ndalesë, prej dy deri në pesë vjet. Në këto kohë ai nuk ka të drejtë të hyjë më në Gjermani. Kështu që nuk ia vlen të bëhet, sepse rrezikojnë shumë.

Deutsche Welle: Dhe dy fjalë për shoqatën tuaj. Ju jeni drejtues i Rrjetit të Bizneseve Shqiptare në Gjermani. Çfarë mund të bëni ju për t’ua lehtësuar bashkatdhetarëve ardhjen në Gjermani?

Mustafë Abazi: Shoqata jonë është e regjistruar në 17 vende të botës. Ne kemi synim të lidhemi me njëri-tjetrin dhe kështu e kemi më të lehtë t’i sistemojmë njerëzit që vijnë nga Kosova apo Shqipëria në kompanitë tona. Kështu nuk e kanë të nevojshme as të mësojë gjuhën deri në nivel të lartë, por ka mundësi edhe me një nivel prej A2, të vijnë këtu.

Deutsche Welle: Ju vetë keni ardhur si refugjat para 25 vjetësh. Çfarë këshille mund t’u jepni emigrantëve shqiptarë që duan ta ndërtojnë jetën në Gjermani?

Mustafë Abazi: Të integrohen në shtetin gjerman, në kulturën gjermane e të fillojnë të mësojnë gjuhën gjermane, nëse duan të rrinë për një periudhë afatgjate.

Deutsche Welle: Ju, kur erdhët atëherë, a e merrnit me mend që do të rrinit këtu 25 vjet?

Mustafë Abazi: Nuk e kisha menduar kurrë. Ne atëherë kemi ikur nga lufta. Çdo vit kemi pasur dëshirë të kthehemi, situata në Kosovë ishte e vështirë deri sa u çlirua Kosova, dhe pastaj u vendosëm këtu, krijuam familje dhe mbetëm.