Matuidi për Ronaldon: Do të ishte mirë ta kishim njërin prej më të mirëve në botë

Mesfushori i Juventusit, Blaise Matuidi, thotë se do të ishte shumë mirë që njëri prej futbollistëve më të mirë në botë, Cristiano Ronaldo, të luante për Zonjën e Vjetër.

Superylli portugez është lidhur me një kalim te Bianconerët në ditët e fundit, me ç’rast thuhet se kampioni i italian do të shpenzojë 100 milionë euro për të dhe do t’i japë rrogë prej 30 milionë eurosh në sezon.

Gjatë një konference për shtyp, Matuidi është pyetur në lidhje me transferimin e mundshëm të 33-vjeçarit në Juventus Stadium.

Lexo po ashtu Lajmet për RONALDON

“Po, i kam dëgjuar, por tash për tash janë vetëm spekulime. Nuk do të gënjej, do të ishte gjë e mirë ta kishim njërin prej lojtarëve më të mirë në botë te Juventusi”.

“Do të ishte gjë fantastike për klubin dhe lojtarët e Juventusit”, është shprehur mesfushori francez.

Është raportuar se Adidasi qëndron prapa këtij transferimi të mundshëm, edhe pse CR7 ka kontratë “të përjetshme” me Nike që e ka nënshkruar para dy vitesh.

Besohet se vlera e kontratës së Ronaldos me Nike është një miliard dollarë dhe do të vazhdojë edhe pasi ai të pensionohet. Ndërsa krahas tij, janë vetëm dy sportistë që kanë marrëveshje të tilla, LeBron James dhe Michael Jordan. /Telegrafi/