Kontrolle të rrepta për sigurinë e ushqimit

Instituti Ballkanik i Politikave (IPOL) ka mbajtur të premten tryezën e tretë të rrumbullakët në kuadër të projektit “Prokurimi publik, konkurrenca dhe mbrojtja e konsumatorit”, projekt ky i mbështetur nga Fondacioni SOROS.

Drejtori i IPOL-it Seb Bytyçi tha se qëllimi kryesor i tryezës është që të shihet gjendja aktuale e prokurimit publik, konkurrencës dhe mbrojtjes së konsumatorit tash kur Kosova është në pritje të përpilimit të raportit të progresit nga Komisioni Evropian për vitin 2011.

Kurse, Osman Ejupi, kryetar i Komisionit për Konkurrencë, i cili paraqiti problemet me të cilat përballet fusha e konkurrencës në Kosovë, të cilat probleme tha ai do të kishin zgjidhje me një kornizë ligjore të harmonizuar me direktivat e Unionit Evropian për konkurrencë.

Valdet Gjinovci, kryetar i Agjencionit për Ushqim dhe Veterinari, paraqiti punën e agjencionit duke theksuar se mungesa e resurseve njerëzore është njëri prej problemeve më të mëdha me të cilën po përballet agjencioni. “Kemi angazhuar inspektorë dhe do të ketë kontroll më të rreptë në mënyrë që siguria e ushqimit të jetë në nivel më të lartë”, theksoi Gjinovci.

Ndërkaq, Safet Hoxha, kryetar i Komisionit Rregullativ për Prokurim Publik u shpreh se është shumë i kënaqur me gjendjen e prokurimit publik e veçanërisht me përdorimin e procedurave të hapura, ku sipas KRPP-së gjatë vitit 2010 përdorimi i procedurave të hapura ka arritur në 85.7 për qind. “Pra ka pasur rritje nga vitet e kaluara ku përdorimi i procedurave ka qenë në një përqindje shumë më të ulët dhe në këtë aspekt Kosova mund të krahasohet me vendet e rajonit”, tha Hopxha.

Selatin Kaçaniku nga Organizata “Konsumatori”, deklaroi se konsumatori në Kosovë ndjehet i mangët, i shkelur dhe i diskriminuar. “Duke e ditur se mbrojtja e konsumatorit është kusht për integrim në BE institucionet tona duhet të punojnë më me nguti në këtë aspekt sepse kam drojën se kemi ngelur vonë”, u shpreh Kaçaniku. /Telegrafi/