Pandemia e coronavirusit po përhapet nëpër botë dhe deri më tani në nivel global, numri i të infektuarve ka shkuar në mbi një milion, kurse i të vdekurve më shumë se 50 mijë.

Kështu një numër i madh i qeverive kanë vënë masat preventive që do të kontribuonin në parandalimin e përhapjes së mëtejme të coronavirusit, e sipas të dhënave më të fundit 3.8 miliardë njerëz në mbarë botën janë futur në karantinë, transmeton Telegrafi.

Siç raporton Zëri i Amerikës, fjala është për gjysmën e popullsisë së botës, ku shumicës prej tyre u është bërë thirrje apo më mirë thënë janë urdhëruar të qëndrojnë në karantinë me qëllim të parandalohet përhapja e COVID-19.

Zëri i Amerikës ka publikuar disa të dhëna zyrtare duke u thirrur në AFP, ku kë bërë të ditur se masat preventive nënkuptojnë karantinim të obligueshëm apo të propozuar, si dhe ora policore që tani po aplikohet në më shumë se 90 vende të botës.

Tek afro 2.78 miliardë banorë në 49 vende të ndryshme të botës, aktualisht po aplikohet karantinimi i obligueshëm dhe me këtë detyrohen të qëndrojnë nëpër shtëpitë e tyre.

Në Evropë siç është Britania e Madhe, Italia, Franca dhe Spanja tashmë i ka në fuqi këto masa preventive, kurse masa të ngjashme po aplikohen në vendet e Azisë, Indi, Nepal e Shri Lankë.

Në pjesë të caktuara të SHBA-ve, gjithashtu vlejnë këto masa të karantinimit, e madje as Zelanda e Re nuk është kursyer nga këto masa.

Por edhe pse coronavirusi ka mbërritur shumë më vonë në Afrikë, vendet si Maroku dhe Afrika e Jugut kanë filluar të aplikojnë këto masa.

Edhe Eritrea i është bashkuar kësaj liste gjatë të mërkurës, pasi që janë urdhëruar qytetarët të qëndrojnë nëpër shtëpitë e tyre për 21 ditë.

Në shumë vende dalja nga shtëpia mund të ndodh vetëm nëse posedojnë leje të veçantë, që ua mundëson atyre të shkojnë në punë, blejnë ushqimi apo të vizitojnë mjekun.

Në të paktën 10 vende tjera që në total numërojnë 600 milionë banorë, qytetarëve u është bërë thirrje të qëndrojnë nëpër shtëpi, por kjo masë nuk është e obligueshme. Njëjtë është duke vepruar Gjermania, Kanadaja, Meksika dhe Irani.

Në të paktën 26 shtete tjera që jetojnë rreth 500 milionë banorë, është vënë ora policore, ku qytetarët obligohen të qëndrojnë nëpër shtëpi për 24 orë. Kjo metodë në masë të madhe aplikohet në vendet e Afrikës përfshirë Keninë, Egjiptin dhe në Mali si dhe në ato të Amerikës Latine siç është rasti i Kilit, Panamasë dhe Porto Rikos.

Kujtojmë që sipas të dhënave të Kombeve të Bashkuara, në botë jetojnë 7.8 miliardë njerëz. /Telegrafi/