Thaçi: Krahasimi i çmimeve krijon konfuzion

Kryeministri, Hashim Thaçi në seancën e Kuvendit të Kosovës ka thënë se Qeveria të çilen e drejton ai do t'i respektoj të gjitha çështjet konfidenciale të kontratës që ka të bëjë më ndërtimin e autostradës Vermicë –Merdare.

Kryeministri duke iu përgjigjur kryesisht deputetëve të Lëvizjes Vetëvendosje ripërsëriti edhe një herë se projekti i autostradës është projekti më transparent. Krahasimi i çmimeve të betonit dhe çmimeve të tjera krijon konfuzione. “Nuk mund të krahasohet një element i kostos me koston e përgjithshme sepse krijon konfuzion. Krahasimi i betonit është sikur të flitet për çmimin e mollës dhe dardhës”, theksoi ai.

Thaçi tha se Qeveria do të respektoj dispozitat Kushtetuese dhe ligjore që kanë të bëjnë me autostradën. Ai i ka ftuar deputetët për të bërë debat lidhur me autostradën.

Ndërkaq, deputetët e Lëvizjes Vetëvendosje kanë thënë se deklarimet e dy ministrave të Qeverisë për kontratën të cilën e kishin publikuar ata tregonte se kjo kontratë mund të jetë e vërteta, por ata thonë se kontrata përfundimtare mund të jetë shumë më e favorshme se sa ajo e publikuar nga ta. /Telegrafi/