Në 25-vjetorin e themelimit të Policisë, Krasniqi ndan një video të Hashim Thaçit

Kryetari i Partisë Demokratike të Kosovës, Memli Krasniqi në 25-vjetorin e themelimit të Policisë së Kosovës ka ndarë një video të ish-kryeministrit Hashim Thaçi i cili kishte inauguruar shkollën e Shërbimit Policor të Kosovës, që pas pavarësisë së vendit u shndërrua në Polici të Kosovës.

Krasniqi në një postim në Facebook shkruan se që nga ajo ditë me dhjetëra mijëra qytetarë të Kosovës kanë shërbyer në uniformën e vendit, duke garantuar sigurinë, paqen dhe stabilitetin në vend.

Lexoni të plotë postimin:

Në qershor të vitit 1999, Hashim Thaçi me shokët e tij u kthye fitimtar nga frontet e luftës për çlirimin e Kosovës. I vetëdijshëm se pas lirisë, rruga për ngritjen e shtetit sapo kishte filluar, me 6 shtator të po atij viti, Hashim Thaçi, si Kryeministër i Qeverisë së Përkohshme, inauguroi shkollën e Shërbimit Policor të Kosovës, që pas pavarësisë së vendit u shndërrua në Polici të Kosovës.

Që nga ajo ditë, me dhjetëra mijëra qytetarë të Kosovës kanë shërbyer në uniformën e vendit të tyre, duke garantuar sigurinë, paqen dhe stabilitetin në vend.

Prandaj, sot, në 25 vjetorin e themelimit të Policisë sonë, u shpreh mirënjohjen më të thellë grave dhe burrave që ndër vite kanë shërbyer me nder, përgjegjësi dhe krenari.

Kosova, si një histori e bukur suksesi, përveç lidershipit të saj të duhur politik në momentet më të rëndësishme, është meritë edhe e policisë së mrekullueshme të vendit tonë.

Urime të gjithë policëve tanë. Jemi me ju dhe krah jush në çdo hap!. /Telegrafi/