SHBA-ja sanksionon kompanitë turke dhe hungareze shkaku i bashkëpunimit me Rusinë

Departamenti Amerikan i Financave ka vendosur sanksione kundër më shumë se 400 individëve, kompanive dhe organizatave për shkak se produktet e tyre ndihmojnë luftën e Rusisë dhe në mesin e atyre të sanksionuar janë kompani nga Turqia dhe Hungaria.

Zëvendëssekretari i Departamentit të Thesarit të SHBA-së, Wali Adeyemo, tha se vendosja e sanksioneve përfaqëson një vazhdimësi të angazhimeve të marra nga presidenti amerikan, Joseph Biden dhe kolegët e G7 për të ndërprerë zinxhirët e furnizimit dhe kanalet e pagesave të kompleksit ushtarak-industrial të Rusisë.

Tani, për herë të parë, një kompani hungareze është gjetur gjithashtu nën sanksione. Për nevojat e prodhuesit të aeroplanëve Sukhoi dhe përmes kompanisë ruse Exiton, kompania hungareze Matrix Metal dërgoi çelsat e integruar elektronik në Rusi. Gjithashtu, kompania hungareze u dërgon rusëve komponentë të shumtë elektronikë përmes një ndërmjetësi në Qipro, shkruan abcnews.

Sanksionet nënkuptojnë ngrirjen e aseteve dhe fondeve në SHBA, që përfshin kompanitë që janë në pronësi të shumicës ose tërësisht nga individë të caktuar. Siç është raportuar në Uashington, Departamenti i Thesarit po synon një numër “rrjetesh transnacionale”, duke përfshirë ato të përfshira në prokurimin e municioneve dhe pajisjeve ushtarake për Rusinë, transmeton Telegrafi.

Format më të zakonshme të shmangies së sanksioneve dhe ndihmës së kompleksit ushtarako-industrial të Rusisë janë prokurimi për oligarkët rusë përmes kompanive offshore, pastaj ofrimi i shërbimeve për themelimin e kompanive, evazioni i sanksioneve nga kompanitë e sektorit të IT, pastrimi i arit i oligarkëve rusë dhe, më e rëndësishmja, prokurimi i makinerive të avancuara dhe komponentëve elektronikë.

Në shpjegimin e vendimit për sanksionet në rubrikën “prokurimi i municioneve”, shtetasi italian Giulio Sfoglietti dhe shtetasi turk, Hayri Tahirbeyoglu përmenden si persona të përfshirë në furnizimin me Rusinë.

Sfoglietti ishte i përfshirë në një rrjet për prokurimin e armëve, municioneve dhe municioneve me vlerë më shumë se 150 milionë dollarë. Tahirbeyoglu ka qenë ndërmjetësi në marrëveshje ndërsa është kryetar i Bordit Drejtues të kompanisë turke për municione, armë dhe material ushtarak, “Taha Savunma”.

Sfoglietti, sipas pretendimeve të Departamentit të Thesarit të SHBA-së, ka punuar gjithashtu në prokurimin e mikroelektronikës dhe çipave për përdoruesit e fundit me bazë në Rusi.

Më shumë se 200 dërgesa mallrash me qëllime të dyfishta (produkte civile që mund të përdoren për qëllime ushtarake) mbërritën në Rusi nëpërmjet Turqisë për kompaninë Promtek, e cila merret me kabllot e rrjetit dhe aeroplanëve dhe lidhësit elektronikë.

Është gjithashtu interesante se dy kompani turke furnizuan Rusinë me mjete që mund të përdoren në prodhimin e armëve. Kompania turke Hidropark, e cila shet pajisje hidraulike dhe pneumatike, furnizoi me makina CNC (për prerje të saktë të materialeve të ndryshme) partnerëve në Rusi. Vlera e pajisjeve të dorëzuara është më shumë se 800 mijë dollarë, që i kalon të ardhurat vjetore të asaj kompanie.

Gjithashtu, kompania turke Feva dërgoi makina CNC në Rusi dhe kishte më shumë se 500 dërgesa në total. Kjo kompani është themeluar pas fillimit të luftës në Ukrainë, në prill të vitit 2022.

Shtetasi rus Yevgeny Petrov themeloi disa kompani në Turqi, të cilat, sipas Departamentit Amerikan të Thesarit, përdoren për të paguar mallrat e dërguara në Rusi dhe gjithashtu kanë lidhje me strukturat e sigurisë në Moskë.

Si mënyra më e zakonshme për të furnizuar Rusinë me lëndë të para kritike për industrinë ushtarake, amerikanët përmendin kompanitë civile ruse, institutet dhe qendrat kërkimore. Nga vendndodhjet e kompanive që përdoren për të anashkaluar sanksionet e vendosura ndaj Rusisë nga Perëndimi, më të përmendurat janë Hong Kongu, Emiratet dhe Kina. /Telegrafi/