Edi Rama “përfshihet” në debatin e plazheve, publikon video nga Velipoja me plot pushues

Kryeministri i Shqipërisë, Edi Rama, ka publikuar disa pamje nga plazhi i Velipojës, ku vërehen turistë të shumtë që po shijojnë bukuritë e bregdetit shqiptar.

Velipoja, një nga destinacionet e preferuara për pushime në verë, po tërheq vizitorë të shumtë si nga vendi ashtu edhe nga rajoni, përfshirë një numër të madh qytetarësh nga Kosova.

Megjithatë, krahas bukurisë natyrore dhe mikpritjes së njohur të shqiptarëve, disa turistë nga Kosova  kanë shprehur pakënaqësi për çmimet e larta që hasen në plazhet e Shqipërisë, veçanërisht në zonat e jugut.

Lexo po ashtu Pushime “të kripura” në jug të Shqipërisë, veriu ofron hartën me plazhet e lira

Sipas tyre, shpenzimet për akomodim, ushqim dhe shërbime të tjera janë rritur ndjeshëm, duke bërë që pushimet të jenë më të shtrenjta se vitet e kaluara.

Në plazhet e jugut të Shqipërisë, të njohura për ujin e kristaltë dhe peizazhet mahnitëse, çmimet për dhomat e hotelit, apartamentet dhe vilat kanë pësuar rritje të konsiderueshme.

Gjithashtu, çmimet në restorante dhe baret e plazhit kanë qenë subjekt i ankesave të shumta, pasi pushuesit raportojnë se ato janë bërë të papërballueshme për shumë familje.

Lexo po ashtu Jo temperaturat, por çmimet 'përvëluese' boshatisin plazhet në Shqipëri

Autoritetet shqiptare janë të vetëdijshme për ankesat dhe po punojnë për të gjetur zgjidhje që do të balancojnë nevojat e biznesit me përballueshmërinë për turistët.

Një qasje e tillë mund të ndihmojë në ruajtjen e reputacionit të Shqipërisë si një destinacion mikpritës dhe të përballueshëm për pushime./Telegrafi/