Katër të vdekur dhe dhjetëra të plagosur nga një përplasje trenash në Çeki

Katër persona kanë vdekur dhe 26 janë lënduar pasi një tren pasagjerësh që ishte nisur drejt Ukrainës është përplasur me një tren mallrash në qytetin çek të Pardubice.

Bëhet e ditur se treni mbante më shumë se 300 pasagjerë, shumë prej të cilëve shtetas të huaj.

Kryeministri i Çekisë, Petr Fiala, shprehu ngushëllime duke thënë se aksidenti ishte “një fatkeqësi e madhe”, shkruan the Guardian, përcjell Telegrafi.

Ndërkohë, Ministri i Brendshëm, Vit Rakusan, tha se pasagjerët e lënduar kanë plagë të lehta dhe se policia tani po i identifikon ata.

Siç raportohet, në stacionin hekurudhor janë vendosur nëntë ambulanca dhe më shumë se 60 zjarrfikës profesionistë.

“Operacioni i shpëtimit ishte i ndërlikuar, pra kjo e bëri të vështirë depërtimin te të lënduarit”, tha zjarrfikësi Pavel Ber.

Një hetim për aksidentin është duke u zhvilluar dhe korridori kryesor hekurudhor që e lidh Pragën me Brnon do të qëndrojë i mbyllur për disa orë.

Ndryshe, Pardubice ishte gjithashtu skena e aksidentit më të rëndë hekurudhor çek në vitin 1960, kur 118 njerëz vdiqën dhe rreth 100 u plagosën në një përplasje të dy trenave të pasagjerëve. /Telegrafi/